Mynta ka sngi ka 28 tarik December u 2025, ka seng Jaiñtia National Council JNC Central Executive Committee kaba aiti ia lade na ka bynta ka bha ka miat ha ka imlang sahlang ha ri lum Jaiñtia, la ialam da U Bah Sambormi Lyngdoh President ka JNC CEC ha ryngkat ki dkhot ka CEC ka la leit ban ujor sha u Deputy Commissioner ka East Jaiñtia hills u Shivansh awasthi ban pyrshah ia ka jingthmu jong ka Shree Cement Limited ban tyrwa ia ka Integrated Cement Plant ha shnong Daistong. Ka seng ka pynpaw iaka jingthied jaka be-ain da u briew shimet bym dei u trai ri u Mr. Bharat Sharma na u trai jaka uba kyrteng u Syrpailang Sukhlain, kumba la batai bniah ha ka kaiphod jong ka kompeni ka Environmental Impact Assessment (EIA) kaba la aiti ha ka 19 tarik u Naiwieng 2025, kaba la aiti sha ka tnad treikam jong ka jylla. Kane ka jingkhaïi ka pynkheiñ ïa ka Meghalaya Transfer of Land Regulation Act, 1971, kaba khang pyrshah ïa kum kine ki jait jingpynkylla khlem ka jingbit jong ka aiñ na ki bor ba dei peit (competent authority), bad ka Jaiñtia Hills Autonomous District Council (ADC).
U President ka JNC u kynnoh ba ka EIA kam don ia ki kot ki sla kiba kongsan, kynthup ia ka jingmynjur jong ka ADC, ki kot ki sla jong ka jingkylla dur, lane kano kano ka jingbit katkum ka ain jong ka Meghalaya land transfer act, 1971, kaba pynlong ia ka jingiateh jaka ban long kaba khlem jingmyntoi naduh kaba sdang. Ka kdew shuh shuh ia ki jingpynkhein ia ka ain (MIIPA) 2024, kaba kren shai ba kam dei ban pynkhein ia ka ain 1971, bad ka jingpynbna EIA, 2006, kaba dawa ban pynsangeh noh ia ka jingpynsngew paidbah kaba la buh da ka MSPCB ha u bnai December 2025. Ka seng ka kynthoh jur ia ka MSPCB namar ka jingbym lehhok ia ka kamram kaba lah leh khlem da bishar bniah ia ka jinglong trai jaka, kaba lah aibor pynban ia ki kompeni ban leh palat bad khlem burom shuh ia ka hok jong ki riewlum katkum ka Article 371B jong ka Riti Synshar.
U President ka JNC ula ong ba ka seng ka kyntait ruh ia ki jingkular ai kam jong ka Shree Cement kum ki bym lah ban shaniah, da kaba kdew sha ki jingduna ha ka jingtbit ha ka thain namar ba ki jaka ki dei kiba kham bun ki jaka rep bad kiba bun ruh ki nongrep suda, ka jingbym don ki plan ai jinghikai, bad ka jingbym leh ei ei jong ka sorkar halor ki polisi thung kam, kaba ka seng kala dawa haka thup Jong ka Save Jaiñtia Mission kaba la sdang naduh 2024 ba donkam ban shna ia ka aiñ thungkam thungjam kaba thymmai hapoh ka thaiñ bad ban thaw iaki lad kamai jakpoh ia ki nongshong shnong nakine ki jait kompeni.
Ka JNC ka maham jur da ka jingiakhih lada ka projek ka iaid shakhmat khlem da pynbeit ia kine ki jingeh, da kaba buh ia ka sorkar ban bah iaka jingkitkhlieh na ka bynta kano kano ka jingkhihwin kaba mih na ka jingbym iahap ha ka rukom treikam.
Hadien ba la ai ia ka jingthoh, ka seng kala iakynduh ia u Deputy Commissioner, uba la pynthikna ia ki ba un shim khia ia kane ka kam, ban rah sha ki bor ba halor, bad ban ai ia ka kopi jong ka jubab jong u sha ka seng hapoh khyndiat sngi.
“Ngi dawa ban tohkit mardor ia ka jinglong trai jaka, ka jingshisha jong ki kot ki sla, bad ki jingbthah sha ka MSPCB bad ka bor peit bniah ia ka mariang jong ka jylla (SEIAA) ban pynsangeh noh mardor ia ka jingpynsngew paidbah (public hearing). Kumba ka jingthoh ka pynpaw ia ki jingma kiba lah ban buh ia ki nuksa kiba shyrkhei na ka bynta ka jingshim jaka hapoh riewlum”. Pynkut u bah Sambormi Lyngdoh President ka JNC CEC.
