Ka Jaiñtia Students Union (JSU) Jowai Circle ka la pynpaw ïa ka jingpyrshah jur halor ka jingthmu ban pynlong ia ka Summer Jam Music Festival kaba la buh ban long ha ka 23 tarik u Jymmang, 2025, ha kawei ka madan kaba don mar syndah bad ka Civil Hospital Ialong, West Jaiñtia Hills District ha shnong Ialong.
Na ka liang ka Seng ka pynpaw ba ka jingpynlong ïa kane ka tamasa ka long ka jingpynkheiñ ïa ki kyndon jong ka Noise Pollution (Regulation and Control) Rules, 2000 hapoh ka Environment Protection Act, 1986, bad kaba lah ruh ban ktah jur ia ki nongthiah pang kiba don ha katei ka Hospital.
Hadien ka jingialang bad ka Additional Deputy Commissioner jong ka West Jaiñtia Hills District, ka seng ka pynpaw ba imat kane ka ophisar ka khlem tip eiei shaphang kane ka festival bad kam don jingtip lada ki la ioh jingbit ne em na ki bor ba dei peit. Kane kala pynkyndit ïa ka seng namar kumno ki nongpynlong ïa kane ka tamasa ki nud ban leh khlem ka jingïoh bor.
Ka Seng ka la ong ba ka jingpynlong ïa ka tamasa kaba heh ha katei ka jaka ba marjan bad ka Hospital kan pynthud shibun ïa ki nongpang, kan wanrah ïa ka jingsahkut kali kaba jur bad kan buh jingeh wat ïa Ambulance ban poi biang por, kane kan buh jingma shibun ïa ki jingim briew.
Kumta ka JSU Jowai Circle ka pyrshah jur ïa ka Tourism Department kaba la kyrshan ban pynlong ïa kane ka festival khlem da pyrkhat ïa ka jingeh jong kiba pang ba shitom bad ruh ia ki briew kiba don bynta ban poi sha katei ka Hospital. Ki jingpynbyrnai ba heh kum kitei la dei ban pynlong sha ki jaka kiba jngai na ki jaka sumar ne ki jaka ba lait na ki ‘silent zone’, pynpaw ki nongialam ka Seng.
Ka JSU Jowai Circle ka kyntu jur ïa ki bor synshar shnong, ka District Administration, Meghalaya Pollution Control Board, bad kiwei ki bor ba dei peit, ban tuklar mardor bad pynkynriah noh ïa kane ka festival sha ka jaka kaba biang, namar ba ka jingkoit jingkhiah ki paidbah ka long kaba kongsan tam ban ïa kita ki tamasa shipor, la pynkut ka kyrwoh na ka Seng.