U Working President ka Khun Hynniewtrep National Awakening Movement (KHNAM) bad Nongaiktien ka Hynniewtrep Border Dispute Redressal Forum (NHBDRF) u Bah Thomas Passah haba kren sha ki lad pathai khubor, ha ka 3 tarik Nohprah 2025 u la ong ka Seng bad ka HBDRF ka pyrshah jur halor ka jingthmu ka Sorkar Assam ban tei ia ka Police Outpost ha Lum Pynthor Lapangap, West Jaintia Hills.
Nalor kata u Bah Thomas Passah u la ong ba ka Sorkar ka shu sngap bad kam pynpaw ei ei ia ka jingpyrshah halor ka jingthmu ka Sorkar Assam ban tei ia Police Outpost ha ka shnong Lapangap.
U la bynrap “Dang ha kine ki sngi ka la don ka jingshah ban beiñ ki paidbah ha ki thaiñ Border ha kaba ia u kba ba la thung kim ioh ban ot haduh ban da don ka jingtuklar kin sa ioh ban ot ia u kba”.
Na ka liang ka KHNAM kaba ju iatreilang bad ka Hynniewtrep Border Dispute Redressal Forum ha ka thaiñ Block-1 kumba long mynta ka pyrshah jur ia ka jingthmu ka Sorkar Assam ban wanrah ia ka Police Outpost ha Lapangap bad lada ka Sorkar Meghalaya ka ailad ia ka Sorkar Assam ban tei ia ka Police Outpost ha u lum Pynthor ha Lapangap kan bun jingma ia ki nongshong shnong ka thaiñ Lapangap.
Ka kamram ka dei jong ka Sorkar jylla bad kam dei ban ailad ia ka Sorkar Assam ban wanrah ia ka Police Outpost ha Lapangap.
