Ki lai tylli ki seng kiba kynthup ia ka Hynñiewtrep Border Disputed Redressal Forum (HBDRF), ka Hynniewtrep Women Welfare Development Organisation (HWWDO) bad ka Movement for Change, mynta ka sngi kila pynpaw ha ki lad pathai khubor ba ki pynrem jur ia ka jingkren ne ka jingkam jong u CM ka Assam u Himanta Biswas Sarma, hapoh ka iing Dorbar Thaw aiñ ka jong ki, ba u ong ba ka shnong Mukroh ka hap hapoh ka jylla jong ka Assam. Ha kaba na ka liang ki nongialam kine ki lai seng ki kwah ban pynshai ba ka shnong Mukroh shi spah na ka shi spah ka hap hapoh ka West Jaintia Hills District jong ka jylla Meghalaya.
Na ka liang u Chandame Sungoh Chairman HBDRF, u la ong ba ngi dap da ka jingsgewkhia bad pynrem jur ruh ia ka jingkam jubor jong u CM jong ka jylla Assam u Himanta Biswas Sarma haka por ba long ka Assam Legislative Assembly session ne Dorbar ha ka 13 tarik jong une u bnai ba la dep, ha ka jingiadei bad ka jingkylli ba la kylli da uwei u MLA na Karbi Anglong uba la kylli ka shnong Mukroh ka hap sha jylla Assam ne Meghalaya, katba na ka liang u CM ka Assam khlem da pyrkhat sani bha u la kren ha khmat ka Dorbar ka jylla Assam da kaba ong ka Mukroh ka hap shapoh ka jylla Assam, bad kane ka jingkren ka jong u ka pynmong ne ka long kaba ktah bha namar u khlem kren ha kano kano ka jaka hynrei u la kren ia kine ki kyntien hapoh ka ïing dorbar thaw-aiñ. Kumta kino kino kiba la kren hapoh ka Assembly ki la long official ne kordor bha.
U ma Sungoh ula ong lada peit tang ia ka notification kaba la mih ha ka snem 1951 khlem da kdew ia kiwei ki notification, ka shnong Mukroh ka hap hapoh ka jylla Meghalaya. Kumta kane ka jingkam jong u CM ka Assam ka long khlem nongrim bad kaba ym lah ban pdiang kaba lah ban pynmih pynban ia ki jingklumar hapdeng kine ar jylla. Kumta u la ong na ka liang ka seng ka kyntu jur ia ki bor jong ka sorkar jylla Meghalaya ban shim khia ia kane ka kam.