Ki ar tylli ki Dorbar Shnong kiba kynthup ïa ka Namdong-B bad ka Mukhnang kiba hap hapoh ka Raij Nangdong, Elaka Nongjngi, West Jaiñtia Hills District, kila ïeng pyrshah ïa ka draft jong ka Delimitation Committee ha kaba kine ki ar tylli ki Shnong ki la shah pynkynriah na ka 10- Mynsngat Khanduli sha ka Shilliang Myntang MDC Constituency.
Ha kane ka Dorbar la ïadon lang naduh u Waheh Shnong ka Namdong-B ma D.S War, Waheh Shnong Mukhnang ma Runi Mukhim, Secretary ka Namdong-B ma Serus Lypon, ma Apostol Shadap, ma Linus Pale bad ki Dkhot jong ki artylli ki EC Shnong, kynthup ïa ki long kmie long kpa bad ki samla kiba ïamih ryntih ha katei ka Dorbar ban pyrshah ïa ka jingthmu jong ka Delimitation Committee ban pynkylla ïa ka rukom long ki Constituency.
Ha kane ka sngi na ka liang ki Seng samla ka Shnong Namdong kila mih sha khmat ban pynsngew ïaka jingbym ïahap ban phiah lyngkhot lyngkhai ïaki constituency khamtam iaki ar tylli ki Shnong kiba ym ïahap satia bad kiba ym don nongrim haei haei ruh namar ka la ïa jngai shaba palat.
Kumta kitei ki shnong kila buh ka jingkyrpad ïa ki bor kiba dei peit ïa kane ka jingphiah Constituency (MDC) ne ka Delimitation Committee ba kin pynbeit kloi ïa kane.
