Ka jingkiew dor palat jong ka umphniang Petrol bad Diesel kumjuh ki Dawai bad ki marbam mardih kaba la ktah ia ki nongshong shnong hapoh ka Ri, ha ka Jylla bad kumjuh ruh hapoh ka District East Jaintia Hills khamtam ia u duk u suk bad kiba kamai kyndoi jakpoh, kumta na ka liang jong ki nongkyrshan jong ka Congress ha East Jaintia Hills kila pynlong ia ka jingpyrshah halor kane jingkiewdor.
Ia kane ka jingialang ban pyrshah jingkiew dor la lamkhmat da ka President ka East Jaintia Mahila Congress Committee ka kong Jhanika Siangshai ha ryngkat ka jingiatreilang bad ka Khliehriat Block Congress Committee ba la pynlong ha ophis treikam jong ka seng ha Rymbai Road mynta ka sngi.
Ha kane ka jingialang la ioh ka jingkren na u President ka Khliehriat Block Congress Committee ma Thunda Sana. U ma Sana ula ong ba kane ka jingkiewdor palat jong ka Umphniang, ki marbam mardih ka ktah shibun ia kiba duk ki semshiliang ki kup shiliang bad khamtam ruh ia ki khynnah pule kiba iabeh ban leit rwing sha ki shnong jong ki.
Ula ong nalor ka jingshah khang ka jingtih dewiong ki nongshong shnong ka East Jaintia kila mad ia ka jingeh kaba khraw, don ki longïing kiba la hap ban shah thngan namar ba ka jingkiewdor sa ki marbam mardih, kumta u buh ka jingkyntu ia ki sorkar naduh ka sorkar pdeng bad sorkar jylla ba kin shimkhia ban teh lakam noh ia kane ka jingkiewdor palat.
La ioh ruh ka jingkren na i kong Darisha Ryngkhlem kaba la khot ka jingiatylli jong ki paidbah ban pyrshah ia kane ka jingkiew dor jong ka Gas, ka Diesel, Petrol bad kiwei. Ila ong ruh ka ba ka sorkar ka dei ban bishar bha ha shwa ban pynkiew dor ia kine ki mar bad kam dei ruh ban kynnoh ia ka jingkhie jong ki thma sha kiwei pat ki ri jong ka pyrthei. Kumta ka sorkar la dei ban pynhiar dor noh mardor ia kine ki mar kiba ktah ia ki longïing longsem baroh.
Ka kong Jhanika Siangshai, President ka President ka East Jaintia Mahila Congress Committee kala ban jur ia ka sorkar ba dei ban pynhiar ia ka dor jong ki dawai dashin, namar naduh ba sdang jong ka 1 tarik u bnai April ka sorkar kala pynkiew dor haduh 800 jait ki dawai bad kane kala ktah shibun ia ki nongshong shnong jong ka ri India baroh kawei, khamta ia kiba duk ba kyrduh.
Ka kong Siangshai kala kynthoh jur iakane ka sorkar ba mynta namar naduh ba kala synshar ha ka ri India kala pynmih shibun jait ki khajna kiba la ktah shi katdei ia ki nongshong shnong. Kala pynpaw ruh ba ha East Jaintia Hills District bun na ki nongshong shnong khamtam ki rit ki ria ki im ja dei na ka kam bylla dewiong, kumta kala buh ka jingkyntu ia ka sorkar ba ka dei ban pyllait noh ia ka kam khaïi dewiong hapoh ka jylla. Khadduh eh ka kong Jhanika ka khot bad wer ia baroh ki nongshong shnong ka East Jaintia Hills District ban don ka jingiatylli ban pyrshah ia kane ka jingpynkiew dor shaba palat jong ka sorkar ia ki umphniang Petrol, Diesel, Gas, ki dawai bad kiwei de.