Ka Hynñiewtrep National Youth Movement (HNYM) West Jaiñtia Hills ka pynpaw ka jingpyrshah halor ka jingpyniaid dewiong be-aiñ da ki katto katne ki briew bym lah ban ithuh. Kane ka jingpyrshah jong ka seng ka long halor ka nongrim ba la tlot palat ka jingkieng Myllep bad nalor ba ki kali ba iaid ki kit palat pud bad kane ka buh jingma ia ka dong ka thaiñ Laskeiñ hi baroh kawei.
Kane ka jingpyniaid kali dewiong be-aiñ lyngba u surok Raliang-Saphai terter shaduh Garompany Assam ka Seng ka la lap ba kine kali ki ba bun hi ki dei jong ki bar jylla bad kine ki kali ki shu iaid kumto khlem ki kot ki sla ki ba biang kum ki challan, GST bad kiwei kiwei ki kot ba donkam. Na ka liang ka Seng ha kine ki sngi ba la dep ka la pyrshang ban iakren bad u S.P. ka West Jaintia u ma Chemphang Syrti IPS, bad na ka liang jong u, u la kular ban shimkhia ia kane ka kam hynrei haduh mynta ruh dang don hi ki Kali ki ba iaid bad kumta ka seng ka kyrpad na ka liang ka sorkar ba ka dei ban leh ei ei halor kane.
Lada ka sorkar ka dang ailad ia ki kali ki ba kit dewiong be-aiñ lyngba u ne u surok te na ka liang ka Seng ka dawa na ka sorkar ba kan pynioh noh da ka jingkieng ka ba skhem khnang ban nym buh jingma ia u paidbah ka thaiñ Laskein Block.
