Ka Hynniewtrep Youth Development Council (HYDC) mynta ka sngi 28 tarik Naiwieng 2024 ka la wan pyntip paidbah sha ki lad pathai khubor halor ka jingpyrshah jong ka Seng ia ka jingai pisa ka sorkar sha ka University of Science & Technology ban pynkha ia ka PA Medical College.
Haba kren sha ki lad pathai khubor na ka liang u General Secretary ka seng Hynniewtrep Youth Development Council u bah Shaniah Suchen u la ong ba ka seng ka pyrshah jur ia katei ka jingai ia ia ka pisa namar ka jingai jong ka sorkar ia ka pisa Rs. 233 klur sha ka University of Science & technology kam don jingmut haei haei ruh namar kane ka pisa ba ka sorkar ka ai kam don ia ka sut.
Shuh shuh u la ong ba kumno kane ka sorkar ka don jingthmu ban ai ia ka pisa Rs.233 klur khlem ka sut (interest) bad kam don jingiohnong ia ki khun samla jong ka Bri Hynniewtrep, kumta na ka liang ka seng ka dawa na ka sorkar ha ka jaka ban ai kane ka Rs.233 klur sha ka University of Science & Technology ka dei ban pyndep noh ia ka Shillong Medical College bad ka Shillong Engineering College.
Kumta ka seng ka kyntu ia ka sorkar da kane ka pisa ban shna noh ia ka Government College khamtam ha East Jaintia, Ri bhoi, Nongstoiñ bad South West Khasi Hills District.
U la bynrap biang lada ka sorkar ka lah ban shna ia kine ki Government college kan long ka jingmyntoi shibun ia ki khun samla ka bri hynniewtrep namar ki don shibun ki khun samla kiba duk ki bym ioh lad ban pule shabar ka jylla. Kumta lada ka sorkar ka pyndep ia kine ki Medical college, Engineering college bad Government college kan long ka jingmyntoi ia shibun ki khun samla ka jylla.
Shwa ban pynkut u la bynrap biang ba ka sorkar ka hap pynshai haba iadei bad ka pisa Rs.233 klur namar ka don kaei re kaei sha lyndet khamtam kane ka jaka pule USTM ka dei jong u riew shimet bad ka dei jong u bar jylla, kam dei satia jong ki Khasi bad na ka liang ka Seng ka pyrshah jur ia kane ka jingai jong ka sorkar sha ka USTM Rs.233 klur bad ka seng ka ai por shiphew sngi ia ka sorkar bad lada kam leh ei ei na ka liang ka seng kan pynlong da ka jingshong kyllain mungor hakhmat ka Secretariat.