Hadien ba la mih ki kynrum kynram na ka daw ba la don ka jingsuba jur lehthok leh shukor haka jingpynkhalai iaki tickets Lucky Draw jong ki Chiyung Multipurpose Society ha ka jingiadei bad ka Frist Prize kaba la buh da ka Dumper Truck . Ka seng All Hynñiewtrep People United Front (AHPUF) kam sngew iahap ia kane, ha kaba kala mih shakhmat ban pyrshah jur ia ka jingthmu ne ka rai jong ka Chiyung Multipurpose Society ban pynkhalai biang iaki tickets ha ka jingiadei bad ka First Prize. U President ka AHPUF u John Phawa, u la ong ba hadien ba la mih da ki phew phew hajar ngut ki briew kiba la ud la nam kumjuh ruh kiba la complaint ha ka jingiadei bad kane ka kam, kumta ka seng kam sngew lah shah ban kut tang ha ka jingkhñium, ha kaba kala mih shakhmat ban ieng na ka bynta ka hok jong ki lak lak ngut ki nongshong shnong ka ri Khasi Jaiñtia kiba shah thok ha kane ka kam. La ong ruh kumno yn pynkhlai biang ki iaki tickets ka First Prize haba kiba bun naki paitbah nongthied kila dep ban bret lut ki iaki tickets jong ki? Ong ka seng. Lada kito ki nong pynïaid ki lap ba don ka jingsuba lehthok leh shukor, te ki la dei ban pyndam ne sangeh ban pynbna ia kato ka ticket Number kaba dei jong ka first prize. Lada ki ong ba don ki dak bniat lane ka la jhieh kato ka ticket, ha ka jingshisha ki dei ban tip ha kato hi ka por ba ka jhieh kato ka ticket, hynrei hadien ba la slem ka por kaba la dei ban rkhiang bad jah kato ka dak bniat bad tip pat ba ka jhieh? Katba la iohi pat kila pynbna ha ka step kaba bud, kaba kim pdiang ia kato ka ticket number kaba pom ia ka first prize. Kane ka pynsuba ia ki paidbah ba don kaei re kaei sha lyndet. Kumta ka seng kala pyrshah jur ia ka jingthmu kane ka society ban pynkhalai ar sien ia ka first prize namar kila dep ban pynbna ia ka number ba pom iaka first prize, ha kaba la bun ki paidbah kiba dep ban thied ticket ki la dep bret lut ia ki tickets jong ki. Kumta kumno yn tip ban wan kam ia ki prize haba ia ki lyngkhot kato ka ticket ki la dep noh ne bret? Kumta ka seng ka la rai ban leit ai da ka complaint sha ki bor jong ka aiñ ban bishar ia kane khnang ba ki paidbah kiba thied ia kine ki ticket kin ioh ia ka hok ka jong ki. Shuh shuh ka seng kala ong ruh kumno ha kato ka miet ia ki khynnah ban klah ne jeid ia ki ticket ruh ki long lypa kiba la dep buh shwa, khlem da jied naphang ha man la ki round jong ki Prize ha kato ka miet. Sa kawei ruh balei khlem tohkit bniah ia uto u khynnah uba la klah ia ka ticket jong ka 1st Prize kaba la don ka jingsuba. Na ka liang ka seng kan nym shong kli kti, hynrei kan iaid shakhmat na ka bynta ba ki paidbah kin hun mynsiem bad tip ia ka hok jong ki. Ia kane ka khubor la phah da u John Phawa President – AHPUF.