Ki ar tylli ki sengbhalang ba kynthup ïa ka Khasi Jaiñtia Youth Students Union (KJYSU) bad ka Jaiñtia National Union (JNU) kila shim ïa ka rai ban pyrshah jur ïa ka jingthmu ban wanrah ïa ka lynti Rel shapoh ka Jaiñtia Hills District.
Kitei ki ar seng kiba kren shai lada long katba long kin mih ban pyrshah jur ïa kane ka jingthmu ka sorkar kaba lah ban lilam pynban ïa ka kyndew ka shyiap jong ki trai ri trai muluk.
Shuh shuh kila pynsngew kane ka jingleh ka sorkar ka khlem da pyrkhat shwa ïa ka jingeh jong ki nongshong shnong kaba ki ïakynduh bad ka jingdonkam mynta ban shna ïa ki surok, ki jaka sumar Hospital, ki skul, ki College bad kiwei de ki jingmyntoi ïa ki paidbah.
Kila kynthoh jur ïa ka sorkar namar ka jingbym lah ban thaw ïa ki lad ki lynti kiba long ki jingmyntoi ïa ka jait bynriew, hynrei kala thombor ban ïuhroit pynban ïa ka hok ki trai Ri kiba long ki jaitbynriew kiba dang duna paid bha haba ïanujor bad kiwei pat ki jaitbynriew hapoh ka Ri.
Halor kane na ka liang kine ki ar seng kila kyrpad jur ïa ki 7 ngut ki MLA kiba long ki nongmihkhmat jong ka Ri-Lum Jaiñtia ba kim dei ban lilam ïa ka District da ka jingwan ka lynti Rel, Namar kumba long mynta ki bar jylla kila sdang ban ban knieh wat ïa ka pliang ja jong ki trai jylla ha ka kamai kajih.
Shuh shuh kine ki ar seng kila kren shai lada long katba long kin ïeng pyrshah beit ïa kane ka jingthmu ka sorkar, khnang ban suk ka pateng hadien, kila buh ruh ka jingkyrpad ïa ka sorkar ba kam dei ban wanrah da ka lynti rel hynrei donkam shwa ïa ka ILP. Kumta ki khot ïa ki paid nongshong shnong ka Ri-Lum Jaiñtia ba kin ïasnohkti lang ban pyrshah jur ïa kane ka lynti Rel, pynkut ka kyrwoh na u President ka KJYSU ma Chemi Phawa.