Mynta ka sngi ka 18 tarik Naitung katto kattne ngut ki nongshong kiba dei na Nongjrong kaba hap ha jongksha PHC, ki la leit ban ia kynduh ia ka Myntri ba dei peit ia ka tnat ka koit ka khiah jong ka sorkar jylla, ka Dr Mazel Ampareen Lyngdoh ban pynpaw ka jingpyrshah ia ka jingpynkynriah kam ia ki arngut ki Doctor kiba peit ha Jongksha PHC.
Haba kren bad u nonglum khubor ki la iathuh ba ka jingpyrshah jong ki ia kane ka jingpynkynriah kam ia kine ki 2 ngut ngut ki Doctor ka dei namar ka jingroi bad jingkiew bad ki jingkylla kiba ki la iohi ha Jongksha PHC bad kumjuh ha ki Sub Centre ba hap ha Jongksha PHC naduh ba wan ma ki.
“Ngi iohi da la ki jong ki khmat ba shibun ki kam ba I Dr A K Nongbri i la trei ban pynbit pynbiang ia ka koit ka khiah ha ki thaiñ Jongksha. Ki nongthiah pang bad nongshim dawai ruh kim dei eh tang ki ba hap ha jongksha hynrei ki dei ruh na kiwei ki PHC. Ka jing transfer ia ki 2 ngut ki Doctor ka ktah bha ia ki nong shong shnong jong kane ka thaiñ, namar ka Jongksha PHC ka hap ban peit haduh 40 tam ki shnong bad ka jingduh jingmyntoi kan dei ia u ba bun ba lang. Mynta ngi iohi ruh ba shibun ki jingshna jingtei ki ba la pynkhreh ha Jongksha PHC ki bym pat lah ban pyndep, na ka liang jong ngi ki nongshong shnong ki ba hap ha Jongksha PHC ngi kwah ba ka sorkar kan da peit bad bishar bniah bha shwa bad ai lad ba kine ki Doctor kin pyndep ia kine ki kam ba ki trei khnang ba kan bit kan biang ia ki nongshongshnong” ki la ong.
Na ka liang jong ki nongshong shnong ki la dawa ba ka sorkar ka dei ban peit bad khmih thuh bha bad ka dei ban ailad ia kine ki Doctor ba kin trei ban kyntiew ia ka koit ka khiah. “Na ka liang jong ngi ngi pyrshah jur ia ka ne ka jingtransfer khlem nongrim, lada dei ka jing transfer na ka daw ba i ioh promotion ngi kmen, hynrei ban shu transfer khlem nongrim ngim lah ban pdiang” ki la pynkut.
