[Ki dkhot jong ka Delimitation Committee ka JHADC kiba dang pyniaid ia ka Public Hearing ha Khliehriat]
Ka Delimitation Committee ka Jaiñtia Hills Autonomous District Council MDC Constituency ka la hiar hynne ka sngi sha Khliehriat bad pynlong ka jingialang ha Dorbar Hall jong ka Khliehriat ban pynsngew paidbah halor ka Draft Delimitation Constituency jong ka. Ha kane ka jingialang pynsngew paidbah nalor ki Waheh shnong/Secretary da ki spah ngut ki Rangbah, ki longkmie bad ki samla na ki Constituency bapher bapher ki la ia mih paidbah bad pynpaw ia ka jingpyrshah jong ki ia ka Draft ka Delimitation Committee bad ia ka saindur jong ka ka bym iahap bad ka jingkwah bad ka jingangnud jong ki paidbah jong kawei pa kawei ka MDC Constituency.
Baroh ki Nongkren na baroh ki Khyndai MDC Constituency jong ka East Jaiñtia Hills District, Rymbai-Khliehriat MDC Constituency, Sutnga Narwan, Sutnga Nongkhlieh, Saipung, Bataw-Lakadong, Tuber, Musniang Rangat, Sumer bad Narpuh MDC Constituency, ki pynpaw ia ka jingbynhun jong ki ia ka Draft Committee kaba la saindur da ka Independent Delimitation Committee MDC Constituency bad ki pynpaw ba kane ka saindur jong ka Delimitation Committee ka long kaba thurmur kaba shu divide and rule ia ki shnong ki thaw khlem da tip ia ka jingjan jingjngai jong ki shnong ki thaw na kawei ka constituency sha kawei ka constituency.
Ha kane ka jinngpynsngew paidbah ( Public Hearing) la ong ruh ba don ki shnong kiba kane ka Delimitation Committee kiba ka pynpait shnong pynpait thaw khamtam ia ki shnong jong ka Sor Khliehriat kiba don hapoh ka juh ka Town Committee, hynrei la pynsaphret ia ki sha ki Constituency kum sha Sutnga-Narwan, sha Rymbai Khliehriat bad shawei ha kane ka juh ka rukom ia kiwei de ki shnong jong ki constituency MDC jong ka East Jaiñtia Hills District.
Ha kane ka Public Hearing jingpynsngew paidbah, na ka liang ki Nongkit kam shnong jong ki shnong ki thaw jong ki Constituency da kaba kyntu ia ka Delimitation MDC Constituency jong ka Jaiñtia Hills Autonomous District lada kane ka Committee kam leh kat kum ka jingkwah bad ka jingangnud jong ki paidbah ka bha ba ha kane ka Election MDC ka ban wan ki Constituency kin long kumba ju long mynshwa bad yn sa pynbeit thymmai pat hadien ka Election ka ban sa long shen hapoh kane ka snem 2024 lane kham hadien.
Na ka liang ki dkhot ka Delimitation Committee ki kubur ba ka don ka jingduna hangne hangtai bad ia kane yn sa pynbeit bad ia ka jingthoh ujor jong ki, ki lah ban phah sha kane ka Committee ba kan saiñdur thymmai kat kum ka jingkwah bad ka jingangnud ki paidbah.
[U ma Justine Dkhar Ex-MLA, kong Violet Lyngdoh Ex-MDC bad ki Waheh Shnong ki dang shahskhor ia ka jingkren waiphang u Chairman ka Delimitation Committee ka JHADC u ma Dr. D.G. Lyngdoh]