Ha ka shnong kaba rit jong ki nongtong dohkha, ka Thumba, Kerala, ha kaba la sdang ia ka jingiaid lynti ka India sha ka haw haw haba la pynher ia ki namding na ka jaka ba don ka Iingmane, phewse ki duna kiba la mutdur ia ka kyrdan ba ka ri kan poi ha kawei ka sngi. Ka la dei ka por jong ka jingkut jingmut jar jar, ha kaba la tei ia ka jingangnud ban poi sha ki khlur watla ki jingdon jingem ki long kiba duna hynrei ka jingthmu ka long kaba khraw, ong u Dr. Jitendra Singh uba dei u Myntri Khynnah ka Sorkar Pdeng (Independent Charge) ba dei khmih ia ka tnad Science and Technology; Earth Sciences bad ba dei khmih ia ka tnad PMO, ka tnad Atomic Energy, ka tnad Space, Personnel, Public Grievances bad Pensions mynta ka sngi.
Kane ka jingkylla kam dei tang shaphang ki namding bad ki satellite— ka dei shaphang ki briew. Ka dei shaphang kumno ka jingstad teknoloji kaba iadei bad ka haw haw ka la rung jar jar ha ka jinglong jingman jong ka jingim kaba man ka sngi, naduh u nongrep ha ka shnong kaba jngai haduh u samla pule ha ka kamra pule lyngba ki lad digital. Hapoh ka jingialam ba don jingthmu jong u Myntri Rangbahduh u Modi bad ka jingpeit bniah jong ka tnad haw haw, ka India ka la pynkylla ia ka kam jong ka kaba iadei bad ka haw haw sha ka atiar na ka bynta ka jingroi, ka jingpynkupbor, bad ka lad.
Ki satellite jong ka India mynta ki don ka bynta kaba kongsan ban ioh jingtip lypa ia ka jinglong ka suiñbneng, kaba iarap ia ki nongrep ban pyrkhat lypa shaphang ka por ban thung bad rep ia ki jingthung ha ka rukom kaba thikna bha. Ha ki jaka ba lah ban shlei um, ki jingtip na ki satellite ki pynlah ban ai jingtip kham kloi bad ban ai jingiarap haba lynshop ki bor ka mariang, kaba pynlait im ia ki briew.
Ban kyrshan ia kine ki jingangnud kiba nangroi, ka India ka dang pynmih ia Next Generation Launch Vehicle (NGLV), kaba lah ban kit 30,000 kilo sha suinbneng. Kan don ki bynta kiba lah ban pyndonkam biang bad ki rukom pynher ba lah ban pyndonkam da ki modular propulsion system, kaba pynlong ia ka jingleit sha ka haw haw kaba kham jem dor bad kaba lah ban iaineh. Ka jaka pynher liengsuiñ kaba lai ha Sriharikota bad ka jaka pynher liengsuiñ kaba thymmai ha Tamil Nadu la shna khnang ban lah ban pynïaid ïa ka jingleit bunsien jong ki jingpynher liengsuiñ bad ban kyrshan ïa ki kam kiba pynmih pisa na ka kam kaba iadei bad ka haw haw.
Ha man la ki bynta jong ka ri, ka jingktah jong ka teknoloji haw haw ka long kaba paw shai. Ha ki jylla Himalaya, ki jingtip na ki satellite ki iarap ban peit bniah ia ki jingtwa khyndew bad ki jingkhih jong ki thah bah. Ha ki jaka rud duriaw, ka kyrshan ia ka jingsumar ia ka duriaw bad ka jingpynkhreh na ka bynta ki jinglynshop ki bor ka mariang. Ha ki jaka riewlum bad ki jaka ba jngai, ka plie lad ban pynrung ia ki kam digital lyngba ka satellite internet.
