Ha ka 31/12/2022 ka Seng Pynroi Pynbha Amlarem Sub-Divisional Amlarem ka la pynlong ia ka Jingialang ha iing Hall ka Syiem Jingsuk Amlarem ha kaba ka la khot ia ki Rangbah Shnong, ki Sengbhalang bad ki riew pawkhmat, riew rangbah jong ka Thain War Jaintia. Ha kane ka Jingialang ka Seng ka la iathuh ia kata ka jingialeh jong ka naduh u snem 2018 ter ter haduh mynta ban pynioh ia ka Sub-Divisional Hospital ha Amlarem kaba dei ka Sub-Divisional Head Quarter. La iathuh ruh ba don lai jait ki hospital (1) PHC (2) CHC bad (3) Ka Sub-Divisional Hospital bad ka long ruh kaba heh tam bad kaba lah ruh ban buh tang kawei hapoh ka Sub-Division bad ka dei ruh ban bud hapoh ka Sub-Divisional Head Quarter. Ka jingpyrshah ia ka jingpynkiew kyrdan ia ka PHC Jarain da ka Sub-Divisional Hospital ka daw ba kong san eh ka long ba ka Jarain PHC ka don shabar jong ka Head Quarter.
Ka Seng ka la iohi bad ka shem ruh ba la da yn buh ia katei ka Hospital ha Amlarem kaba dei ka Sub-Divisional Head Quarter bad kaba long ka pdeng eh jong kane ka Sub-Division khlem pep ki paitbah kin suk bad kin ioh jingmyntoi shibun eh bad namarkata ka Seng ka la ialeh shitom haduh katta katta ban ioh jaka hangne hapoh ka Head Quarter. Bad ka la ioh ruh ia ka jaka ban buh ia kane ka Sub-Divisional Hospital kaba ym duna ia ka 10 Acre na u Hat Dhar Chairman ka Kur Dhar Sohtken Shmiashyiang Village Amlarem Sub-Division bad ia kane ruh la pyntip sha ka Health Department na ka bynta ban leh ia kaba donkam bad ruh da kaba ai copy sha u Local MLA u Lahkmen Rymbui man ba ngi thoh ngi dawa ban buh Sub-Divisional Hospital hangne ha Head Quarter. Ka Seng ka la pynpaw ia ka jingsngewnguh sngewburom kaba khraw ia ka Health Department namar ba ngi iohi bad shem ba ka iaid ne leh kat kum ka ain synshar khadar ka ri, hynrei kaba sngewsih ka long pat ba na ka liang u Local MLA u ma Lahkmen Rymbui u la leh da khongpong ia kane da kaba u pynkiew kyrdan bym shongnia shonghok ia ka PHC Jarain da ka Sub-Divisional Hospital ha kaba ka Seng ka la ialeh naduh u snem 2018 ter ter bad haduh mynta ban buh ia katei ka Sub-Divisional Hospital ha Amlarem ka ba dei ka hok jong ka Sub-Divisional Head Quarter kata ym ban pynkiew kyrdan ia ka PHC Jarain da kane ka Hospital.
Hadien ba la iakren ba la ia pyrkhat sani bha bad ba la ia sngewthuh shai ruh ha kane ka jingialang ba ka jingpynkiew kyrdan ia ka PHC Jarain sha ka Sub-Divisional Hospital kaba ka Hospital ka long ka bym shongnia satia. Kumta ka Jingialang ka la rai ban dawa na ka Sorkar ban weng noh ia ka Jingpynkiew kyrdan ia ka PHC Jarain kaba don shabar ka Head Quarter, da katei ka Sub-Divisional Hospital kaba dei ka hok kynti jong ka Amlarem Head Quarter, bad ban buh beit ruh ia ka hapoh ka Sub-Divisional Head Quarter, Amlarem. Ha kane ka jingialang ka la rai ruh ba dei ban ialeh iakane khlem man thait tad haduh ba ka Sorkar kan buh ia kane ka Hospital ha Amlarem, namar ka long kaba da shongnia shonghok shisha ban bud ia ka hapoh ka Sub-Divisional, Head Quarter kata ha Amlarem.
La pynmih ia kane da u Babyson Pakyntein Chairman Seng Pynroi Pynbha Amlarem Sub-Division, Amlarem