Ka jingïalehkai phutbol 1st Division bala pynïaid da ka East Jaiñtia Hills District Football Association (EJHDFA) kaba la long mynta ka sngi ha madan Deinchynrum, Khliehriat.
Haba phai sha ka jingïakhun ‘Quarter Final’ kaba lai mynta ka sngi naka liang ka kynhun ïalehkai jong ka Khliehriat West FC kala pynliem ïa ka Rangad SC lyngba ka jingïashut Tie Breaker da 5-4 kol.
Kine ki ar kynhun ha ka jingïakhun hapoh jong ka por ba la buh kiba la ïakhaid da mar shikol (1-1) bad kaba la pynhun shisha ïa ki nongwan peitkai, ïa ka kol na ka Khliehriat West FC la thep da u Jasmine Talang haka minit ba 6, katba na ka liang ka Rangad SC kala lah ban pynphai kylla ïa katei ka shikol haka minit kaba 8 da u Hermon Dkhar.
Lyngba kane ka jingjop jong ka Khliehriat West FC kala ïoh ban rung sha ka Semi Final jong kane ka lympung ïalehkai.
Ka jingïakhun ‘Quarter Final’ ba khadduh lashai ka sngi 19.10.2023 kan long hapdeng ka Byndihati SC pyrshah ïa ka Tpepswer SSWO haka por 2 baje nohphai sngi.