Ka long ka burom ia ka ri India bad khamtam eh ia ki nongshong shnong jong ka jylla Meghalaya haba ka jylla ka la ioh ban khur ia ka nam lahduh ha ka United Nation’s World Summit on the Information Society (WSIS) Forum 2022 ha ka jingsam khusnam kaba la pynlong mynta ka sngi ha nongbah Geneva, Switzerland ia kaba la leit ban pdiang burom da u Myntri Rangbah ka jylla u Conrad K. Sangma.
Ka Meghalaya lyngba ka project Meghalaya Enterprise Architecture (MeghEA) kala shah jied hapdeng ki 360 tylli ki project bala pdiang da ka UNO. Napdeng kine ki 360 tylli la jied sa 90 tylli ki project ki ban shah khot sngewbha ban ia don bynta lang ha ka sngi ban sam ia ki khusnam ka ba la pynlong mynta ka sngi ha Geneva. Ka Meghalaya ka la hap ban iakhun pyrshah ia ki ri baheh bad ki ri kiba la shai jong ka pyrthei. Kine ki ri ki kynthup ia ka Australia, China, Argentina bad ka Tanzania bad mynta ka sngi ka jylla ka la sakhi ia ka sap bad ka jinglah ha kaba kala shah jied ban long ka nongjop ne lahduh.
Kane ka MeghEA jong ka jylla Meghalaya ka dei tang ma ka hi ka Project napoh ka ri India kaba ioh ia ka nam jop ha kane ka snem. Kane ka project ka dei “The role of Government in the promotion of ICTs for development” bad ia ka khusnam la aiti da u Secretary General ka ITU u Houllin Zhao ha u Myntri Rangbah ka jylla u Conrad K. Sangma.
Kum ban shu pynkynmaw ba ia kane ka project la pyntrei da ka Planning Department jong ka sorkar Meghalaya. Ka project ka don shibun ki bynta ban leh ban wanrah ia ka jingiajan jong ka sorkar ha ka roi ka par ha ki liang ka khaïi pateng, ha ka liang ka jingtrei jingktah bad kiwei kiwei.
Ka E-Proposal System kawei na ki bynta jong ka jingtreikam ka sorkar sha ka sorkar (Government-to-Government services) ka long kawei na ka jingjop ban pynstet ka jingpyntreikam ia ki skhim sorkar bapher bapher. Dei lyngba kane ka jingtreikam ka la wan rah ka jingkylla kaba sted bha bad ka jingioh jingmyntoi jong ki nongshong shnong ka long kaba khraw shibun.
Lyngba kane ka E-Proposal bad ka jingpyndonkam ia ki kor ki bor jong ka jingstad ka juk ba mynta (digital) tang hapoh ki ar bnai kane ka project kala ioh ban trei kynjoh 1600 tylli ki jingdawa bad la lah ban pyllait jingiarap haduh T.790 klur tyngka. Lyngba kane ka project la lah ban pyndep ia ki kam tang ha ka shisngi ha ka jaka da ki bun bnai haba ianujor bad ki rukom trei ba mynshwa.
Haba kren ha ka jingialang ha Geneva, u Myntri Rangbah Conrad K Sangma ula ai khublei ia ki nongshong shnong ka jylla Meghalaya na ka bynta kane ka jingjop ba donburom kaba la pynlong ia ka ri ban sngewsarong ia ka jylla Meghalaya. Ula ai khublei kyrpang ruh ia u Myntri Rangbahduh ka ri India u Narendra Modi uba la shaniah ha ka jylla Meghalaya ban pyntreikam ia kane ka Project ba nyngkong duh hapoh ka ri India (India’s 1st Enterprise Architecture initiative).
U Conrad ula ong ruh ba ka jylla Meghalaya nalor kane ka Enterprise Architecture Project ka sorkar ka pyntreikam ruh ia ki digital prokram kiba iarap ia ki kynthei ba armet, ban pynioh dawai da kaba pyndonkam da ki drones bad ruh ban iarap ha ka rep ka riang. Lyngba ki ICT ka sorkar ka kwah ban pyniasoh bad ban rat ia ka jingeh jong ki thaiñ nongkyndong baroh.
La iathuh ba ia kane ka Meghalaya Enterprise Architecture la pyntrei hapoh ka jingiarap jong ka NeGD (National e-Governance Division), ryngkat ka jingiasnohkti lang jong ki tnad sorkar bapher bapher kaba la wan rah ia ka jingjop jong kane ka project. Ula ong ruh ba ka sorkar jylla dang shen kala phah ia ka jingtyrwa sha ka World Bank na ka bynta ban pan jingiarap ban pynbit pynbiang shuh shuh ia kane ka project.