Ha jingialehkai kynjat bol phainal jong ka 14 u Kiang Nangbah Memorial Trophy Super Division 2022, bala pyniaid da ka West Jaintia District Sports Association hynnin ka sngi 8.10.2022 ha Kiang Nangbah Stadium Ladthadlaboh Jowai ka 7 Wasa ka la ioh ban rah ia ka nam lahduh hadien ba ka la lah ban pynliem ia ka Ladthadlaboh SC da 2-0 kol.
Ia kane ka phainal ialehbol u ma Sniawbhalang Dhar MLA uba long ruh u myntri ka sorkar jylla ba dei peit iaka kam pynroi sor bad kiwei ula long u kongsan.
U ma Dhar ha ka jingkren u pynpaw ka jingkmen haba ula ioh ia kane ka lad ban long u kongsan ha kane ka jingialeh phutbol phainal, hapdeng ka 7 Wasa bad ka Ladthadlaboh SC, ha ka juh ka por u ai ka jingkhublei ia ki nongpyniaid jong ka WJDSA, kiba pyniaid ia kane ka jingialeh kynjat bol bad ia baroh kito kiba ia donkti ha kaba ban pyniaid ia kane ka 14 Kiang Nangbah Memorail Trophy Supper Division Tournament 2022.
Haba kren ha kane ka ka sngi u ma Dhar u ong ba ha ka jingialeh don ka liang kaba jop bad don kaba rem, na ka liang kaba jop to nang ialehkai bha shuh shuh, ban nang kiew shaphrang.
Bad ki nongialeh bol na ka liang kiba rem kim dei ban duh jingkyrmen hynrei ban nang ialehkai bha bad ban jop ha ki jingialeh ha ki por bad ki snem ban dang wan. U ma Dhar u kyntu ia baroh ki nongialehkai bol jong ar tylli ki team (7wasa & Ladthadlaboh) ba kin don ka mynsiem ialehkai. Bad kaba kin iasei ia ki sap bad ki talent ialehbol ka ban pynkmen bad pynsngewtynnad ia baroh ki nongpeit kai bol.
Ka jingialehkai bol ka long kaba itynnad bad kaba mar ia ryngkat bor. Na ka liang ka Ladthadlaboh ka kham iohlad bunsien ban thepkol hynrei kam shem la lah ban thep, ha kaba kylla step ka 7 wasa kala ioh ban thep shikol bad bud sa shikol ha ka kylla miet.
Bad haduh kaba kut jong ka por ka Ladthadlaboh SC kam shem la lah ban pynphai kylliang bad ka neh ka jingthep kol, ka 7 wara da 2-0 ia ka Ladthadlaboh SC. Ha kane ka sngi phainal ialehbol da ki hajar ngut ki nongwan peitkai bad ki riewieit phutbol na kylleng ki bynta jong ka ri Lum Jaiñtia nalor ki nongshong shnong ka sor Jowai kila wan ban pyndap ia ka Kiang Nangbah Stadium.
La iadonlang ruh ki kynrem ki lyngdang kum u dolloi ka Elaka Jowai ma Puramon Kynjing, ma Octomewot Lamin MDC, ma P.K Boro MCS, ADC WJH District bad kiwei de ki riewkhmat kiba la shah khot sngewbha. Nalor ki nongkitkam ka WJDSA.
Ia ka khusnam sha ki nongjop bad ka song pisa sha ka kynhun kaba jop bad barem la sam da u Dolloi Jowai bad u ma Lamin MDC.
