Ka AG Meghalaya Futsal Team ka la ioh ban rah ia ka nam lahduh jong ka lympung Big FM’s Big Futsal Fest, Shillong kaba dei ruh ka lympung Inter Office Futsal ba nyngkong duh ha ka jylla ia kaba la pynlong da ka Big FM ha madan Thrive Sports Arena, Langkydring, Shillong.
Ha katei ka jingïakhun phainal, ka AG ka la lah ban jop da kaba suk ia ka Meghalaya Secretariat Home Guards (MSHG), kata da 6-1.
Ia kane ka lympung la wan ban plie pyrda da u Myntri ba khmih ia ka kam ialehkai, u Bah Shakliar Warjri. Lyngba kane ka synjam, la ioh ban sakhi ia ka sap jong ki samla kiba la don ha ka kam khamtam kiba la Rangbah.
Ia ka khusnam Golden boot ne rangialehkai ba ioh ban thep bun kol tam la ioh ban khur da u Fivestar Shylla, ia ka khusnam Golden ball ne rangialehkai ba kynsai tam la khur da u samla Sheen Sohktung katba ia ka ka khusnam Golden glove ne rangapkol ba tbit tam ha kane ka lympung baroh kawei la ioh da u Kitbok Nongrum na ka ophis MIMHANS.
U Aiborlang Khongjee uba dei uwei na ki khlur ialehkai ba la paw ka jylla uba dei ruh u rangialehkai barim ka India u la ioh ban don bynta ha kane ka sngi ha kaba u la ioh ruh ia ka kabu ban sam ia ka khusnam sha ka kynhun AG kaba dei ka lahduh jong kane ka lympung.