Ka Sailung Ialong kala long ka kynhun kaba iohrah ia ka nam lahduh ha ka lympung ïalehkai phutbol bala ai nam Independence Day Cup Under-17 Football Tournament 2022 ba la pynïaid da ka West Jaiñtia District Sports Association (WJDSA), hadien ba kala pynliem ia ka Ialong Luti Tuber.
Kane ka lympung ïalehkai phutbol kala poi sha kaba kut (Final) hynnin ka sngi 15 tarik ha madan Kiang Nangbah Stadium, Jowai.
Haba phai sha ka jingïakhun Final hapeng ki ar kynhun na ka shnong Ialong kita ka Luti Tuber bad ka Sailung Ialong, ka jingïalehkai kala long kaba itynnad bad iakhaid bha namar ka jingïakhun naduh ka kylla step haduh ka kylla miet ym shem la don kiba ioh ban pynkhih ïa ka jar.
Kumta la hap ban pynlong da ka Tie Breaker ha kaba ka kynhun jong ka Sailung Ialong kala lah ban pynliem da 5-4 kol ïa ka Luti tuber Ialong. Ha kane ka sngi pynkut u MLA ka thaiñ ma Wailadmiki Shylla ula long u kongsan ha ryngkat ka jingdonlang u Synbud kongsan u Deputy Commissioner West Jaiñtia Hills District ma Garod L.S.N. Dykes, IAS.
La sam ruh ia ki khusnam ba ioh rah ia ka Man of the Match kaba la leit sha u Seiborlangki o Rymbai na ka Sailung Ialong, Best Goalkeeper la ioh da u Heimonmitre Shylla ka Luti tuber Ialong, Top Scorer la ioh da u Banshanbor Pale ka Sailung Ialong uba la thep haduh 9 kol, katba ia ka nam Player of the Tournament la ioh da u Iohbhah Dhar jong ka Luti Tuber Ialong.