Ka kynhun ïalehkai jong ka Mulang Ialong SC kala long ka lahduh ha ka jingïakhun phainal mynta ka sngi 7 tarik u Nailur haka lympung “4th U Adelbert Laloo Memorial Trophy” jong ka kyrdan 3rd Division Football Tournament 2024, bala pynïaid daka West Jaiñtia District Sports Association (WJDSA) Jowai ha madan Kiang Nangbah Stadium Dongmihsngi, Jowai.
Haba phai sha ka jingïakhun phainal hapdeng ka Mulang Ialong SC bad ka Loomsoiung New Hills kala long kaba ïakhiad bha namar haduh ba kut jong ka por ïakhun kim shem la ïoh ban thep kol kata naduh ka kylla step haduh jong ka kylla miet, na ka liang ki bor pynïaid kila hap ban pynïakhun da ka Extra Time.
Ha ka jingïakhun na ka liang ka Mulang Ialong SC kala ïoh ban thep ïa ka shikol lyngba u Richard Dhar haka minit ba 93 jong ka jingïakhun (extra time) bad dei lyngba kane ka kol kala pynlong syndon ïa ka Mulang Ialong SC ban long ka nong jop jong kane ka lympung mynta u snem.
Ïa ki khusnam sha ki nongjop la sam da u kongsan ma Tympang Laloo uba dei ruh u President ka Kur Laloo Jowai, haka jingdonlang u DSO ma K. Passah, ki nongkitkam ka WJDSA naduh u Working President ma E.M.H Passah, Vice President ma Patrict Lamare, Football Secretary ma Nangebor Suting, kiba haïing u (L) Adelbert Laloo nalor kiwei de kiba la shah khot sngewbha.
Ha kane ka sngi ïa ka nam Top Scorer la ïoh rah da u Elad Dhar jong ka Myrjai uba la thep kol haduh 10 kol, Best Goalkeeper la ïoh da u Confirm Bang ka Loomsoiung Newhill, Man of the Match la ïoh da u Richard Dhar naka Mulang Ialong bad ka nam Player of the Tournament la ïoh da u Nidaroi Mulieh naka Mulang Ialong.
