Ka lympung ialehkai “Open to all 18 Above Football League Knockout Tournament-2021” ba la pyniaid da ka West Jaiñtia District Sports Association (WJDSA) kala poi noh sha kaba kut mynta ka sngi saitjaiñ ha ka jingiakhun phainal hapdeng ka Ñiaw Wasa United FC pyrshah ia ka Lutituber Ialong SC ha madan Kiang Nangbah Stadium Ladthadlaboh Dongmihsngi, Jowai.
Ha kane ka lympung mynta u snem ka kynhun ialehkai jong ka Ñiaw Wasa United FC kala long kum ka lahduh da kaba pynliem syndon ia ka Lutituber Ialong SC ha ka phainal da 6-0 kol.
Na ka liang u ma S.K Lato Former Member ka WJDSA & IPP Rotary Club Jowai ula long kum u kongsan ha kane ka sngi phainal, ha ka jingiadonlang u Working President ma E.M.H Passah, Vice President ma Patrick Lamare, u Darilang Lamare, u Hony. General Secretary ma Lammat-oo Laloo, Football Secretary ma Nangebor Suting, ma Sajeki Passah bad kiwei de kiba la shah khot sngewbha.
Haba phai sha ka jingiakhun phainal jong kane ka lympung kala long kaba kham noh shilliang hapdeng kine ki ar kynhun, ha kaba ka kynhun ialehkai jong Ñiaw Wasa United FC ha jingiakhun jong ka kylla step kala thep haduh 5-0 kol bad ia kine ki kol la thep da u Baiahunlang Tariang u la thep marwei haduh ar kol ha ka minit kaba 12 bad 28, u Dashngain Sukhlaiñ, u George F Ryngkhlem bad u Sanjini Dkhar kila ioh ban thep mar kawei ka kol kata ha ka minit kaba 20, 35 bad 38.
Haba wan ban bteng ia ka jingiakhun jong ka kylla miet ka jingialehlai kala long kaba kham itynnad bad kaba iakhait namar ka kynhun Lutituber Ialong SC kala pyrshah hi katba lah ban pynphai ia kitei ki kol; ka la sei ia la ki buit bad ki sap ialehkai jong ka hapoh madan hynrei na ka liang ka 7 Wasa United ruh kala ialeh ban iada bad khang lad ia katei ka jingpyrshang jong ka Lutituber Ialong SC.
Dei ha ka minit kaba 80 ka 7 Wasa United kala ioh ia kawei ka kol lyngba ka penalty ha kaba u rangialehkai u Weibha Nongtdu ula shim ia kane ka bynta ban shut ia ka penalty, khlem da pynleh nohei ula thep da kaba suk ia katei ka shi kol, haduh ba kut ka jingiakhun jong ka kylla miet ka Ñiaw Wasa United FC kala thep kol haduh 6-0 kol bad rah syndon kum ka nam lahduh jong kane ka lympung.
Ia ki khusnam sha kitei ki ar kynhun kiba kynthup ia ki trophy, ki medal lem bad ka song pisa la sam da u kongsan ha ryngkat ki nongpyniaid jong ka West Jaiñtia District Sports Association (WJDSA). Katba ia ka nam ‘Man of the Match’ jong kane ka lympung la ioh da u Nikhil Dkhar jong ka 7 Wasa United FC bad ka nam ‘Top scorer’ la ioh da u Midaia Dhar jong ka Lutituber Ialong SC.
Kumban shu pynkynmaw baroh ki kynhun kiba la wan ban iashim bynta ha kane ka lympung ki don haduh 12 tylli kiba kynthup ia ka Ñiaw Wasa United FC, Lutituber Ialong SC, Newhills SC, Khliehchnong SC, ka Lumkyrwiang SC, Panaliar SC, ka Mulang Ialong SC, Kseh Sylle Ialong SC, Pasyih Cultural SC, ka Caroline SC, Chilliang Raij SC bad ka Mukhla SC.