[Ka kynhun ialehkai jong ki khynnah U-14 ka West Jaiñtia kiba la ioh rah ia ka nam lahduh]
Ka jingialehkai football ba la tip kum ka Meghalaya Youth League 2024 kaba nyngkong eh ka la poi sha ka ba kut bad ka jingialehkai ka long kaba itynnad ha kaba ia ka nam lahduh ka la leit sha ka West Jaiñtia District Sports Association ha ka kyrdan U-14 bad ka Shillong Sports Association ha ka kyrdan U-16 hadien ar tylli ki jingïalehkai phainal kaba la long ha madan ïalehkai SSA First Ground Polo.
Ka West Jaiñtia DSA ka la pynliem ia ka Nongstoiñ District Sports Association da 2-0 kol ha ka jingialehkai final kaba nyngkong, hadien kata ka Shillong Sport Association ka la pynliem ia ka Ri-Bhoi District Sports Association da 2-1 kol ha ka por nohphai sngi.
Ia kane ka lympung la pynlong da ka Meghalaya Football Association bad la ai jingkyrshan da ka Sorkar.
U kongsan ha kane ka sngi u la long u myntri ka tnad ialehkai u bah Shakliar Warjri bad kiwei ki riew rangbah kiba kynthup ia u MDC ka Mawsynram u Bah Alvin K Sawkmie bad u Working President ka Meghalaya State Olympic Association u Shri John F Kharshiing kila iadon lang.
La wan ban long kongsan ha kane ka jingïakhun phainal jong ka U-14 da i Deputy Commissioner ka East Khasi Hills ka Smti R.M Kurbah IAS. Ha kane ka sngi la donlang ruh ki dkhot ba kham rangbah jong ka MFA, ha kaba la ialam da u President u Bah Hamletson Dohling bad u General Secretary u Sunesh Syiem.
Ha ka jingiakhun final U-14 u Shanmiki Myrchiang ka WJDSA u la thep kol ban buh ïa ka kynhun jong u shakhmat ha kaba sdang jong ka kylla miet u Elvinson Lyngdoh u la ioh ban thep ïa ka kol kaba ar tang hadien katto katne por, ha kaba ka NDSA kam shym la lah ban pyniakhaid watla ka la pyrshang katba lah.
La i kumba ka kylla step kan long khlem kol ha ka phainal jong ka U-16 ruh hynrei ka Ri-Bhoi ka la ai penalty bad ïa kane la pynphai kylla da u Menangpyndap Khongjee ha ka por ba kut ka por.
Ka RBDSA ka la ïoh ban pynïakhaid shen hadien ba la sdang biang ïa ka kol, hynrei lyngba u Wanplielad Marbaniang hadien ka jingleh bakla jong u nongap kol ka SSA hynrei u Iminstar Mawlong u la pynphai biang ïa ka jingïakhun ïa ka Shillong hadien ba u la shut bha wat la u la shah kynthoh da ki lai ngut ki nongapdien. Ka Ri-Bhoi ka la pyrshang ban pynkhih ïa ka jingïalehkai sha ka extra time hynrei ka bol kaba bha tam jong ka ka la shah khanglad noh.
Baroh ar tylli ki kynhun kiba la jop ki la ïoh khur mar ar lak tyngka ka song pisa, katba kiba wan baar ki la ïoh 1 lak tyngka.
Haba kren ha ka jingïalang pynkut, u Bah Shakliar Warjri u la ai khublei ïa baroh ki khynnah kiba la ïashim bynta ha ka MYL na kylleng ka jylla halor ka jingaiti lut jong ki bad ruh u la ai khublei ïa ki bahaïing hasem, ki paralok bad ki coach.
“Ka Meghalaya Youth League ka iahap bha bad ka jingthmu jong ka sorkar jylla ban kyntiew ia ki samla ialehkai jong ngi bad kine ki jingpyrshang kin sei soh na ka bynta ka jylla jong ngi hadien habud,” la ong u myntri.
U bah Shakliar Warjri u la pyntip ruh sha ki paidbah ba ka MFA Turf kaba don ha Third Ground yn siang noh da u Artificial Turf uba thymmai ha kine ki bnai ban wan.
“Ngi tip ba ka phutbol ka dei ka jingialehkai kaba ka jylla jong ngi ka ieit eh bad ka sorkar jylla ka la rai ban siang thymmai da u artificial turf ba thymmai ha madan 3rd Ground Polo u la pyntip.
Kumban shu pynkynmaw Ïa kane ka Meghalaya Youth League MYL la plie paidbah ha ka shiteng jong u bnai Kyllalyngkot da u Myntri Rangbah ba donburom ka jylla Meghalaya u Shri Conrad K Sangma. Ha katei ka por u la pynbna ba katei ka lympung kan long kaba “pynkylla ia ka jingialehkai” bad kan don ka jingktah kaba khraw ha ka pyrthei ialehkai phutbol baroh kawei ha Meghalaya bad shabar ruh.
[Ka kynhun ialehkai jong ki khynnah U-16 ka Shillong Sports Association]