Ka rynsan pyni dohksah ba nyngkong eh hapoh ka Ri-Lum Jaiñtia ïa kaba la tip kum 1st All Meghalaya Amateur Body Building Champion, Mr. Ironman Amateur 2021 bala pynïaid da ka Jaiñtia Body Building Fitness Association ha ryngkat ka jingkyrshan ka MBBFA/WFF, la pynlong ha kane ka 18 tarik u Nohprah, 2021 ha District Library Auditorium Mynthong Jowai.
Wat la ka long ka sien ba nyngkong ban pynlong ïa kane ka ryngkan hapoh ka District hynrei kala long pat kaba ishongkun da ka jingwan ïa shim bynta da ki 63 ngut ki rang pyni dohksah na kylleng ka jylla, la pynsngew ruh ba ka jingthmu ban pynlong ïa kane ka rynsan ka long shi bynta ban ïarap pynmih pisa ïa ka Body Mass & Fitness GYM Jowai.
Ha kane ka sngi u Deputy Commissioner ka West Jaiñtia Hills District u bah Garod L.N.S Dykes (IAS) ula long u kongsan ha ryngkat ka jingdonlang u Dolloi ka Elaka Jowai ma Puramon Kynjing, u ma E.M.H. Passah Working President ka WJDSA, u Ex MDC ma P. Lyngdoh, u Flanagan Kharwanlang President ka MBBFA, u President ka JBB&FA samla Yoosar Kynjing bad kiwei de.
U President ka MBB&FA samla Yoosar Kynjing haba ai jingkren ula ong ba ka thong jong u ban pynlong ïa kane ka 1st All Meghalaya Body Building Champion, Mr. Ironman Amateur 2021 ka long shi bynta ban ai mynsiem ïa ki khun samla ka thaiñ Ri-Lum Jaiñtia ba kin mih shakhmat ban pynpaw pyrthei ïala ka met ka phat ba ki don bad ka long ruh kum ka lad ban pynshlur ïa ki lyngba ka jingdon kum kane ka rynsan ïakop pyni dohksah.
U samla Yoosar u kyrmen shkem ba ha une u snem ban wan ba na ka liang ka Jaiñtia Body Building & Fitness Association kan pynlong biang ïa kane ka rynsan ïakop bad kin don bun ngut ki samla shynrang bad kynthei na kane ka thaiñ kumjuh na ka jylla ba kin wan ïashim bynta.
Mynta u snem ha kane ka jingïakop ki nongjop ha ka Body Building Championship (over all) la ïoh rah da u Wanraplang Thubru na ka Body Zoo GYM Shillong, ha ka Men’s Physique Championship (Over all) la ïoh da u Nashville. G. Pajuh na ka Fitness First GYM Shillong. Katba ïa ka nam ha ka liang ki kynthei ‘Women’s Fitness Championship la jop da ka Ibalary Shisha Khyriem na ka BT. 27 Training Revolution Shillong.
Ha ka 55 kg Category ki nongjop ki don 5 ngut, ha ka 60 kg category 5 ngut, haka 65 kg category 5 ngut, ha ka 70 kg (body Building Below) ki don 3 ngut, katba ha ka 70 kg Body Building Above) ki don 4 ngut. La pynshong shit shuh shuh ïa kane ka sngi da ki jingpynbyrnia kum ki jingshad bad ki jingrwai.