Ka HUCC kala long ka lahduh hadien ba kala pynliem ïa ka Ummulong SC haka jingïalehkai phainal jong ka Under-15 Boys T20 Cricket League 2022 ba la pynïaid da ka All Jaiñtia Cricket Association (AJCA) kaba la long ha madan Jrisaleiñ Jowai mynta ka sngi.
Hashwa kane ka jingïakhun phainal la don ka jingïalang ba la pynïaid da u ma Arwotki Sumer Vice President ka AJCA, la ïoh ruh ka jingkren na u kongsan ma Philander Lyngdoh uba dei u Waheh Shnong ka Chutwakhu Jowai ha ka jingdon lang u President ma Edystone Shylla bad kiwei de ki khot ka Association.
Haba phai sha ka jingïakhun ka kynhun HUCC kala wan ban tied nyngkong bad kala lah ban kamai haduh 102 run na ki 19.5 over bad hap lut baroh ki wickets, u Wanso lamare ula kamai 30 runs, u Maremdor Sutnga 18 runs, kiba ïoh khur wickets na ka Ummulong ki long u Balajied Lamare ula pynhap haduh 3 Wickets.
Haba ban beh ïa ka thong ka Ummulong SC kala lah ban kamai tang 61 runs na ki 12 overs bad hap lut baroh ki Wickets.
ïa ka nam Man of the Match la ïoh da u Maremdor Sutnga, ka HUCC, ka nam Man of the Series la ïoh da u Maremdor Sutnga hi uba la kamai 77 run bad 13 wicket ha ha kane ka lympung. ïa ki khusnam sha ki nongjop la sam da u kongsan bad ki dkhot ka All Jaiñtia Cricket Association, ha kane ka sngi la sam ruh ïa ki Cricket Kits sha ka shnong Chutwakhu, Umshangiar bad ïa ka Ummulong Sports Club. La pyntip ruh ba haduh mynta ka madan ïalehkai Cricket hapoh ka District ym pat don da kaba biang pura, hynrei mynta ka kynti la sdang ban tei ïa kawei ka madan Cricket ha Ummulong bad kyrmen skhem ba ha une u snem ban wan yn sa ïoh ban pynïalehkai noh ha katei ka madan (Stadium) da ka jingïarap ka BCCI lyngba ka Meghalaya Cricket Association.
