Ka All Khasi Meghalaya Tourist Taxi Association (AKMTTA) ha ka 18 Tarik Nailur 2024, ka la shim ia ka rai ban dang pynjur ia ka jingiakhih jong ki , katba ka sorkar kam pat khot ia ki nongialam ban iakren halor ka jingdawa jong ki nongñiah kali tourist trai jylla.
Ha ka jingialang kaba la long mynta ka sngi ha Madan Malki, na ka liang ka AKMTTA ka la shim ia ka rai ban phah shwa da ka ‘open latter’ sha u Myntri Rangbah ka jylla u Conrad K Sangma ban pynsngew halor ki jingeh kong ki, bad kin ai por shitaiew ia ka Sorkar ba kan jubab bad lada ka sorkar kam shim khia eiei ka Association kan pynlong da ka jingiaid rally ka ba jaijai , bad kan sa pynlong ruh da ka jingiakhih da ka ba shah thngan khlem buh por.
Haba kren ha kane ka sngi na ka liang u President, u Bah Ricaldinius Dohling u la pyntip ia ki sienjam ba ka Association kan shim ha ki sngi ki ban sa wan lada ka sorkar kan dang bteng ka jingleh matlah ia ki jingdawa ka Association.
” Kum ka association ka la wan da ka lynti kaba jaijai ha khmat ka sorkar ban ud ia ki jingeh , hynrei ka sorkar ka leh bym salia bad ka pynlong ia ki nongñiah kali ba kin hap ban mih sha madan” u la ong.
U la bynrap ruh da kaba ong ” ia ki nongñiah kali, ka Sorkar kam lah ban khot noh sha ka jingiakren hynrei ia ki kharmotor ki shimkhia ban kdup ban ai jaka , ka khubor hi sha ka sorkar ka long ba lada ki dang bteng ban leh kyllut , kum ka Association kan sa mih madan ban pynkhnñiuh ia ka shuki jong ki “.
U la buh ruh ka jingkylli ba balei ki nongñiah kali ki dei ki ba poh, ba ka sorkar kam kwah ban khot ia kren? U la kdew ruh ba lada ka Dawki, Dewlynnong, ka Sohra ka don ha ka jylla Assam, ki nongñiah kali tourist na ka Jylla Meghalaya ki la kut ka kamai tang ha Jerobart. Hynrei kaba lyngngoh ka long ba ki ong ba ki kali ki duna sa 3000 hynrei ki 4-5000 ki ba shongsngi pat kim iohi.
U la pynshai ruh ba ka Association kam khang ia ki kali Assam ban wan sha ka jylla Meghalaya hynrei ka Sorkar ka dei ban thaw da ka aiñ ban khang ia ki kali tourist na Assam ba kin ioh ban rung sha kylleng ki jaka jngohkai Pyrthei ha ka jylla Meghalaya.
