Ka Meghalaya Commercial Truck Owner and Drivers Association (MCTODA) Jaiñtia Unit, kan pynlong beit ïaka jingïakhih (indefinite Strike) ka ban sdang naduh mynta ka sngi 27 tarik u Risaw naduh ka por 9 baje mynstep ha Jowai Bye-Pass hapoh ka shnong ka Mihmyntdu bad Khliehtyrshi.
Kane ka jingïakhih ka long pyrshah ïaka dor jong ka bai kit ïa u Clinker na ki Company Cement, na ka liang ka seng kala dep ban rai ïa kane haka General Meeting kaba la long haka 14.10.2025 ha Laitkor, Shillong ban pyntreikam katkum ka dor bala dep pynbeit da ka sorkar jylla.
La dawa ruh ïa ka rukom pynkit ïa u Clinker ka dei ban ïaid noh salonsar da u line khnang ban ïoh jingmyntoi ïa baroh, khamtam ïa ki trok trai jylla ym tang ïa ki kali jong ki karkhana ne kiba nabar jylla, ïa kane ka jingdawa ka seng kala dep ruh ban pyntip ruh sha u Symbud Myntri Rangbah ka jylla u ma Sniawbhalang Dhar.
Halor kane ka jingïakhih bala khot pynlong da ka seng hadien ka jingïalang kaba la long hynnin ka sngi 25 tarik kila rai ban ïaid beit shakhmat, wat na ka liang ki bor District ka West Jaiñtia Hills District ki khlem ai jingbit ban pynlong ïa kane ka jingïakhih kaba ktah ïa ka ïaid ka ïeng.
Kumta MCTODA ka khot ïa baroh ki nongñiah trok bad kumjuh ïa ki trai trok napoh ka jylla ba kin wan ïasnohkti lang khnang ba kane ka jingdawa kan long kaba jop. Kane ka long katkum ka kyrwoh bala pyntip da u President MCTO&DA-JHU u ma H. Pariat.
