Ki Nongkitkam shnong ka shnong Myntriang East Jaintia Hills District haba kren hynne ka sngi ha ki Nongpathai Khubor ha Jowai, halor ka jingwan theh niut (Jakhlia) ka Jowai Municipal Board ha kawei na ki jaka (thliew dewiong) ha Linar ka jaka tihdewiong kaba la iehshrah naduh ba khangtih dewiong ka ka National Green Tribunal (NGT), ka jaka ka bym da jngai eh na ka shnong bad na ka liang ka shnong hadien ba la lap ia kane ka jingwan noh niut ha kane ka jaka, ka la lum ia ka dorbar ban lap ia u briew uba donkti bad kane ka jingwan bret jakhlia ha kane ka jaka.
Ha kane ka jingshong dorbar ba kyrkieh jong ka shnong ha ka 12 tarik Lber 2022, hadien ka jingkylli jingtohkit na ki nong shong shnong mano ba don kti ha kane ka jingwanrah ia ka Jhep (niut) ban wan bret ha kane ka jaka Linar ha ‘rudnong Myntriang. La ong ba ha kane ka jingkylli jingtohkit, u ma Wolding Lamurong u la kam ba u donkti ha kane ka jingwan noh niut jong ka Jowai Municipal Board ha kane ka jaka Linar. Nangta u ma Wolding Lamurong u la phla ruh ba ia kane ka jingwan bret niut ka Jowai Municipal Board u la shu leh marwei bad u ma Sniawbhalang Dhar MLA bad u Chairman ka Jowai Municipal Board khlem da tip u Rangbah shnong, Secretary shnong bad ki Nongshong shnong jong ka shnong Myntriang.
Na ka liang ki Nongshong shnong jong ka shnong Myntriang hadien ba ka la tip ba ia kane ka kam la shuleh marwei jong u Wolding Lamurong khlem ka jingtip jong ki Nongshong shnong, na ka liang ka shnong ka la bthah ia u bad ia ki bor ka Jowai Municipal Board ba ki dei ban khur bad pynkhuid ia kine ki niut shisyndon ban lait ka sma ka iwtung ka shnong ka thaw bad ban lait na ki jingpang ba bun jait ki ban mih na kane ka jakhlia kaba ka Jowai Municipal Board ka la wan bret ha kane ka jaka Linar.
Halor kane ka jingdawa jong ki Nongshong shnong ka Myntriang, ka shnong ka la ioh ia ka jingkyrshan kaba pura na ka liang jong ka Khasi Students Union Myntriang Unit. La ong ruh ba na ka liang ka KSU lada u ma Wolding Lamurong bad ki bor jong ka Jowai Municipal Board kim wan pynkhuid, na ka liang ka KSU kan ym shong kli kti tat haduh ban da pynkhuid ia kane ka niut kaba ka la wanbret ha Linar.
