U Planning Rymbai uba ju khot ieit u ma Plan uba long teng u MDC jong ka Musniang Rangat Constituency ha ki snem 1994-1999 mynta ka sngi ula pyntip paidbah ba un ai ka jingkyrshan ba pura ïa u ma Nehlang Lyngdoh uba dei u kyrtong ka NPP na 6-Khliehriat LA Constituency ha kane ka jingïakhun MLA ban long ha u 2023.
U ma Plan haba kren ha u nongthoh khubor u ong ba ka jingkwah jong u ban ai ka jingkyrshan ïa u ma Nehlang Lyngdoh ka long halor ka jingïohi bad jinglap jong u ïa ki kam kiba u ma Nehlang ula trei ha ki ar term ba u jop MLA. U ong ba u ma Nehlang u long u briew uba kloi ban ïarap ïa ki duk ki suk, ki kup shiliang sem shiliang, ïa ki shnong ki thaw ki lynti syngkein (surok), ki um bam um dih, ki light, ki Hospital bad bun kiwei kiwei ki jingleh bha jong u ha ka imlang sahlang.
Kumta u ma Plan u khot lang bad kyrpad ïa kito ki nongbud kiba ju kyrshan ïa u ha ki por ba u ïeng ïaleh MDC na kane ka Constituency ba kin sngewbha ban ai ka jingkyrshan ba pura ïa u ma Nehlang Lyngdoh kumba ma u ruh u kloi ban kyrshan khnang ban poi sha ka thong jingjop bad ban wan rah shuh shuh ïa ki lad jingïarap ïa kane ka Constituency bad ïa ka jylla hi baroh kawei.