Mynta ka sngi 10/09/2025 ka ïingbishar jong u N.A. Khan District & Session Judge, Jowai kala rai pynrem ïa uwei u rangbah ba la tip kyrteng u Dros Pakem katkum ka kyndon aiñ (Section) 304 Part II IPC.
Ia u Dros Pakem la rai pynrem hadien bala pynkut noh ïa ka jingshong bishar ia ka Case kaba la ujor ha ka 24.07.2011 ha u ophisar In-Charge ka Jowai Police Station, da u Hainibait Pakem uba dei u para jong u (L) Dao Pakem uba la khlad noh na ka daw jong ka jingshah tied da ka lyngknot ha ki bynta ka khlieh da u Dros Pakem ha ka por 10:00 baje ei ie mynmiet, kaba la jia ha Mooralong, Jowai.
Wat la u Dao Pakem ym shym la khlad hashen, hynrei u la khlad noh ha ka sngi ba bud jong ka 24.07.2011na ka daw jong ka jingmynsaw jur katba dang pynkit ia u sha Civil Hospital, Jowai. La Register ia ka case katkum ka Jowai PS Case No 103(7)11 U/S 302 IPC bad ia kane ka case la shimti da u SI E. Pohchen ban pynlong ka jingtohkit. Ha ka jingpynkut ïa kane ka jingshong bishar mynta ka ïingbishar kala rai ban set along noh 2 (Ar) snem ryngkat ka kuna kaba Rs.5,000/- (San Hajar) tyngka.
