Ha ka jingshong bishar jong ka ïingbishar ka kong B.Khriam, Special Judge (POCSO), East Jaintia Hills District, Khliehriat ia ki ar tylli ki mukotduma (Case) ka ïingbishar kala rai pyrem ia ki ar ngut ki briew ia kiba la tip kyrteng kum u Peitlang Bamon bad u Shambu Ray da kaba rai set along ia ki mar 7 snem ha ryngkat ka kuna ba ki hap ban siew.
Katkum ka khubor ba la pyllait da u Superintendent of Police, East Jaintia Hills District, Khliehriat, la iathuh ba ha ka jingiadei bad ka Case jong u Peitlang Bamon ka dei kaba la register ha ka Khliehriat Women Police Station C/No.32(08)2021 U/s 7/8/11(i)/12/18 POCSO Act bad ia kane ka Case la tohkit da ka WP-Inspector ka kong O. Tyngkan.
Hadien ka jingtohkit la lap ia ka jingdonkti jong u Peitlang Bamon ban bat jubor ia ka wei ka khynnah rit, kumta ka ïingbishar kala pynmih ia ka rai ban set along ia u 4 bad 3 snem, kaba long katkum ka jingpynshitom jong ka aiñ u/s 8 & 12 of POCSO Act, ha ryngkat ka kuna kaba Rs.20,000/- (Arphew Hajar) tyngka jong kawei kawei ka kyndon. Lada um lah ban siew ia kane hapoh ka por un sa shah set tam sa shibnai.
Na ka liang ka ïingbishar kala bthah ruh ban siew bai lutksan sha kane ka khynnah rit Rs.1,50,000/- (Shilak Sanphew Hajar) tyngka.
Ha kawei pat ka Case kaba iadei bad u Shambu Ray kaba la Register ha Khliehriat Police Station C/No.27(04)2023 U/s 5(m)/6 POCSO Act. Ia kane ka Case la tohkit da i SI D.D. Warjri bad la Charge Sheeted ia u katkum ka CS No.19/2023 dated 11.07.2023. Hadien ba la dep ia ka jingtohkit la lap ia ka jingdonkti jong u Shambu Ray ban leh jubor ia kawei ka khynnah rit.
Kumta ka ïingbishar jong ka kong B. Khriam, Special Judge (POCSO), East Jaintia Hills District, Khliehriat kala rai pynrem ia u da kaba rai set along haduh 7 snem ryngkat ka kuna kaba Rs.30,000/- (Laiphew Hajar) tyngka.
Ka ïingbishar kala bthah ruh ban siew bai lutksan sha kane ka khynnah rit Rs.4,00,000/- (Sawlak) tyngka.
