Ka ïingbishar jong u Noor-Ain Khan (MHJS), Sessions Judge, West Jaintia Hills District, Jowai, ha ka 10 tarik mynta u bnai kala rai pynrem ia u Deling Talang uba na ka shnong Bhain, Shiliang Myntang katkum ka kyndon U/S 304 Part-II IPC.
Katkum ka khubor ba la pyllait da u SP jong ka West Jaintia Hills District la iathuh ba kane ka kes kala sdang da ka FIR kaba la ujor da u Gedrik Sten ha ka 19.12.1998, ha kaba la kynnoh bad u khun jong u ba la tip kyrteng u Bniahbha Pala ula leit sha jingtrei ha ka 18.12.1998, ha ryngkat bad u para arkmie jong u, u Sweet Pala ban bylla thang rnga ha ka jaka ba la tip kum ka Sahpat ha shnong Barato. Katba ki dang leit phai shala ïing utei u Deling Talang ula wer ia u Bniahbha sha ka ïingsah jong u, kaba don ha Laser bad hangta ula dung pynmynsaw ia u ha ka por kumba 6:00 PM. Kumta ia ka kes la register ha Jowai PS Case No.146(12) 1998 U/S 302 IPC bad ia ka jingtohkit la shim da u SI P.S Khongtip.
Ha ka jingshim bishar kaba khadduh ha ka 10.03.2026 ka ïingbishar Session Judge, West Jainita Hills District, Jowai kala rai pynrem ia u Deliang Tariang bad la rai set phatok ia u 5 (san) snem lynter ryngkat bad ka kuna kaba Rs.1000/- (Shihajar tyngka). Lada um lah ban siew ia ka kuna un shah set pyntam sa shibnai.
