Mynta ka sngi (24.02.2026) ka ïingbishar jong i P. Syngkon, Special Judge (POCSO), ka la rai pynrem ia u Duh Timung, na ka shnong Barato katkum ki kyndon; Section 5(m) (n) jong ka POCSO Act bad ka Section 506 IPC.
Ka kes ka sdang da ka FIR kaba la buh da ka kong Thwi Sten na ka shnong Barato ha ka 22.09.2018 kaba la kynnoh ba u Duh Timung ula bat bor ia la ka khunruid kaba dang 11 snem ka rta haduh ar sien. U la maham ruh ia kane ka khynnah ba kam dei ban iathuh briew hano hano ruh lym kumta un sa pyniap ia ka.
Hadien ka jingphet rieh jong u, la ioh ban kem ia u ha ka 17.09.2019, ha kaba la register ia ka kes ha Nartiang Police Station katkum ka No. 34(09)2018 U/S 5(1)(m) (n) POCSO Act R/w Section 506 IPC. Ia ka jingtohkit la pynlong da ka WPSI kong I. Kharpran.
Hadien ka jingbishaar kaba khadduh jong ka ïingbishar Special Judge (POCSO), West Jaintia Hills, Jowai la lap ia ka jingdonkti jong u Duh Timung bad la rai set phatok ia u 10 snem ryngkat bad ka kuna kaba Rs.10,000/- hapoh ka aiñ POCSO. Kumjuh sa 2 snem ryngkat bad ka kuna kaba Rs.25,000/- namar ka jingmaham pyniap briew katkum ka Section 506 IPC. Kumta ka por ban set phatok ia u Duh Timung ka long haduh 12 snem lynter.
Kane ka long katkum ka khubor ba la pyllait da u S.P. jong ka West Jaintia Hills District.
