Mynta ka sngi ka Meghalaya Legislative Assembly Secretariat kala pynlong ia ka jinglehkmen Advance ne ka Pre-Christmas bad ka jingiaseng duwai, kaba la pynlong ha Administrative Block kaba don ha Khyndailad Shillong.
Ha kane ka prokram u Commissioner & Secretary, Meghalaya Legislative Assembly u Dr. Andres Simons ula ai ka jingkren pdiang sngewbha ia baroh. U la pdiang sngewbha ruh ia u Lamphang (Speaker) jong ka ïingdorbar Thawaiñ ka jylla u Thomas A Sangma, ia u Deputy Speaker u Timothy D Shira, ia u Chief Minister u Conrad K Sangma, ia ki ar ngut ki Dy. CM u bah Preston Tynsong bad u ma Sniawbhalang Dhar, ia ki Myntri Sorkar, ki MLA, ki Speaker ba mynshwa, ki MLA barim, ki sahep bad nongtrei jong ka Meghalaya Legislative Assembly Secretariat. Ha ka jingkren jong u, ula ai khublei ia baroh ban ioh ia ka jingsuk, ka jingkoit jingkhiah bad ka jingkmen ha ka jingim.
La ioh ka jingkren na u Lamphang (Speaker) u Thomas A Sangma, uba la ai ka jingkhublei Christmas sha baroh namar ka jingrakhe ia kane ka sngi kala jan poi. U la ong ba wat hapdeng ka jingbunkam ha ka jingtreikam ban kit ban bah ia ka lyngkor jong ka synshar ka khaddar, hynrei ka long pat kaba donkam ban shim ia kane ka kynti ban lehkmen ia ki jingkyrkhu jong kane ka samoi kum ka dak jong ka jingiatylli bad ka mon babha. U la pynkynmaw ruh ba ka Christmas ka dei ka sngi kaba kyrpang bad ba kongsan tam na ka bynta ki paid riew ngeit Khristan.
U Myntri Rangbah, Conrad Sangma ruh haba ai jingkren ula pynpaw ka jingsngewnguh ia ka Meghalaya Legislative Assembly Secretariat kaba la pynlong ia kane ka prokram Pre-Christmas bad ka jingiaseng duwai.
U Pastor Lyndan Syiem ula ai ia ka khubor Chirstmas bad ialam ruh ha ka jingduwai ha kaba iadei bad ka sngi wan long briew u Jisu sha kane ka pyrthei.
Ha kane ka prokram la ioh ia ka ka jingrwai na ki khynnah jong ka AW Thomas Girl’s Home bad u MLA ka Mawkyrwat u bah Renikton Lyngdoh Tongkhar.
Kala don ruh ka jingiaid Christmas Carols, ha ryngkat ki riam tynrai ryngkat ki sur ba la ai da ka St. Cecilia Choir jong ka Laitumkhrah Parish Cathedral, ka choir barim tam jong ka Shillong Archdiocese kala pynsawa ia ki sur jingrwai jong ka.
Na ka liang jong u Lamphang u Thomas A Sangma ula ai ki jingai sngewbha sha ki khynnah khunswet jong ka AW Thomas Girl’s Home.
