Ka Khasi Authors’ Society, Shnat Jowai ha ryngkat ka jingïatrei lang bad ka Thomas Jones Synod College, Jowi mynta ka sngi kaba dei ka sngi rakhe ia ka sngi u Thomas Jones ne u kpa ki dak thoh Khasi kala pynlong ia ka Lympung-Ïamir-Jingtip halor ka phang “U Synñiang U Thomas Jones sha ka Jaitbynriew Khasi” ha katei hi ka jaka pule.
Hashwa ban sdang jong kane ka Lympung-Ïamir-Jingtip ha ki ar bynta la don ka jingïalang ba la pynïaid da ka shongknor kaba dei ka nonghikai jong ka Khasi Department ka Renda Manla Khonglah, ka Jt. Secretary KASSJ, la ioh ruh ka jingkren pdiang na u Principal jong ka College Dr. D.G. Lyngdoh, ki nongkitkam jong ka KAS, Shnat Jowai, ki nonghikai (Lecturer) jong ka College, ki samla pule, ki nongthohkot nalor kiwei de.
Ha kane ka sngi u Rev. K. Pariat, Senior Executive Secretary KJP Synod Mihngi ula long kum u kongsan uba la pynpaw ka jingsngewkmen ban ïadon bynta lang ha kane ka sngi ba kyrpang ban rakhe ia ka sngi u Thomas Jones. Ula ai ka jingiaroh kyrpang ia ki nongthoh kot ka Ri-Lum Khasi Jaiñtia kiba long shisha kita ki nongbat skhem ia ka riti ka Dustur ha ka liang ka thoh ka tar jong u Khasi.
Kane ka lyngkhuh snem ba 182 jong u Thomas Jones naduh ka sien ba nyngkong jong ka jingwan ïuhkjat ha Ri Khasi ha ka 22, Jylliew 1841, ha ka por jong ka aiom slap kaba jur eh bad la pdiang burom ia u da ka sorkar.
La ïoh ruh ka jingkren na u Phrikshon Kharsharing, Finance Secretary KAS kumjuh ruh na u wei na ki nongthoh kot Khasi ba paw u K.W. Nongrum uba la sam ruh ïa ki kot kiba ula dep thoh sha ka KAS Shnat Jowai, kumjuh sha kane ka jaka pule, ha ka juh ka por ula pyllait hi ruh ïa ka kot kaba u dang shu dep ban thoh.
La pynphuh shuh shuh ïa kane ka sngi da ka jingrwai tynrai shaphang u Thomas Jones da ki samla pule jong kane ka College. Katba ïa ki kyntien ai khublei la ïoh na ka kong I. Dkhar
Ha ka Lympung-ïamir-jingtip ha ka bynta ba nyngkong la pynïaid da ka kong Renewbiang Dkhar, Dkhot KASSJ, ha kaba la ïoh ka jingbatai bniah na u Riewshemphang Dr. D.R.L Nonglait, President ka KAS Shillong halor ka phang “U Synñiang u Thomas Jones sha ka thoh ka tar” bad la ïa shim bynta lang ha ka jingïaphylliew jingmut lang.
Ha ka bynta kaba ar jong ka sienshon la pynïaid da u ma M.M. Thaiang, Vice President, Shnat Jowai, KAS bad la ïoh ka jingbatai na u riewshemphang Rev. H.C.T Sumer halor ka phang “U Synñiang u Thomas Jones sha ka imlang ka sahlang. Ha kaba la ïoh ruh ïa ka jingïaphylliew jingmut bad ka jingpynwai.
