Ka Jaiñtia Hills Development Society (JHDS) kaba pynïaid ïa ka CHILDLINE 1098 mynta ka sngi 14 tarik kala rakhe pyndonburom ïa ka Sngi burom ki Khynnah ïa kaba la tip kum ka Children’s Day.
Ïa kane ka prokram la pynlong ha ka Ophis Treikam ka JHDS kaba don ha Lumbihsyntu, Mihmyntdu West Jaiñtia Hills District.
Ha une u snem, ka JHDS ka la rakhe kyrpang ïa kane ka sngi na ka bynta ki khynnah bym ïohlad ban leit skul kiba wan na ka longïing baduk.
Ka jingthmu ba kongsan ka long ban ai mynsiem bad pynshlur ïa kum kine ki khynnah ban ym duh jingkyrmen wat lada kim ïohlad kum ba kiwei pat ki khynnah ki ïoh.
U Director ka JHDS u Fr. Manbha Pakem haba ai jingkren ha kane ka sngi u la kyntu ïa kine ki khynnah ban ïaineh ha ka jinglong ba bha ym ban ngop ha ki kam kai ka juk mynta. Shuh shuh ula ong ba bun na kiba lah heh la san ki bym shym leit skul hynrei ki trei ha ki kam bapher bapher la ha ka kam Balang lane imlang sahlang bad kiwei ruh de ki kam khaïi pateng. Kumta u kyntu ba kin trei shitom bad kohnguh ïa ka jingsneng kiba la san khnang ba kin long briew man briew lashai la shisngi. Ha kane ka sngi la don ki jingïalehkai bapher bapher kiba pynkmen ïa ki khynnah ïa kaba la pynïaid da ki Staff jong ka CHILDLINE Jowai bad la pynkut da ka jingïa bamja lang, ha ka nohphai sngi la don ka jingot cake bad sam ïa ki jingai sngewbha (Gift) da ki Blanket ïa kaba la sam da u Director ka JHDS Fr. Manbha Pakem ha ka jingïadonlang u Coordinator ka JHDS u Ma Denis Kurkalang bad ki Staff ka Childline.
