Ka Sohkha Kynjai Club, Sohkha Mission, West Jaiñtia Hills District, mynta ka sngi kala rakhe ïa ka jingdap 100 snem ne ka ‘Centenary Jubilee Celebration” (1925-2025), ha ka jingïalang bala pynlong ha Community Hall Sohkha Mission.
Ka Sohkha Kynjai Club kala rakhe ïa kane ka jingdap 100 snem kum ka dak ban pynpaw pyrthei ïaka jingïaid lynti jong ka da ka jingïatylli bad ka jingburom ïa ka riti dustur jong ka thaiñ Sohkha Mission.
La sdang ïa ka prokram naduh ka por 11:00 baje mynstep bala pynïaid da u Levellin L. Gadew uba dei u Chairman, la ïoh ka jingduwai da u Rev. Dr. S. Hayong bud sa ka jingkren pdiang burom bad ka jingpyndeng syntiew sha ki riew donburom. Ha kane ka sngi la ïoh ruh ïa ka jingrwai pdiang na ka Sohkha Kynjai Club.
Ha kane ka prokram kiba ai jingkren ki kynthup naduh u Shri Lenardo L. Gadew, President ka Sohkha Kynjai Club, ki nongïalam shnong na u Shri S.G.R. Lanong, u ma H.B. Lanong, Adviser ka All Sohkha Development Committee, na u ma Wanphrang Hayong Gassah, District Librarian, na Dr. Lede E Miki Pohshna, MCS, na ka kong Dolly Khonglah ka Secretary ka MIECC bad na u Jamshaphrang Pohtam, MDC ka War Central. Ha kaba la ïoh ruh ka jingshad tynrai da ka Iengskhem Cultural Organisation bad ka Sohkha Shnong.
La sam ruh ïa ki khusnam sha ki riew pawkhmat jong ka Sohkha Kynjai Club, Sohkha Mission halor ka jingnoh synniang jong ki sha ki kam ba bha hapoh ka shnong ka thaw.
Katba u kongsan u Dr. A.J. Syngkon uba dei u MP ka Shillong ula pyllait paidbah ruh ïa ka Souvenir, ka jingplie ïa u maw sah jingkynmaw jong ka jingrakhe dap 100 snem, ka jingot ïa u Cake bad ula ai ruh ka jingkren, haba pynkut ïa ka jingïalang ki khynnah skul ka Sohkha Government Higher Secondary School kila ai ka jingshad tynrai, katba ïa ki kyntien ai khublei la ïoh da u Visherly L. Gadew.
