Ka Mihmyntdu Community Social Welfare Association (MCSWA) mynta ka sngi kala ioh ban rakhe ia ka jingdap 40 snem pura ka jingshakri jong ka ia ka imlang ka sahlang.
Ia ka jingialang la pynlong ha Salaroh, Jowai ha kaba u ma Brightstar Chyrmang uba dei u MDC ka North Jowai Constituency ula long u kongsan. La wan ban iadon lang ha kane ka sngi da u Director & Founder MCSWA u ma Wilson Dohling DDTI MACS bad u ma Lambor Suchen uba dei u Skill Development Officer ka MSSDS West Jaintia Hills.
U kongsan haba ai jingkren ha kane ka sngi ula pynpaw ia ka jingsngewkmen ban ioh lad ban iadon bynta ha kane ka jingrakhe jong ka MCSWA ia ka jingdap 40 snem ka jingshakri jong ka. Ula ong ba ka MCSWA kala leh shibun ki kam kiba bha ha ka imlang ka sahlang kiba la pynioh jingmyntoi ia kiba bun ba lang khamtam ia ki khun samla kim bym ioh kam ioh jam. Lyngba jong ka MCSWA bun ki samla kila iohlad ban ieng hala ki jong ki kjat.
Mynta ka sngi ruh u MDC ula ioh ban ai mynsiem lem ia ki samla kiba la pyndep ia ka jingai jinghikai lyngba kane ka seng. Ula ong ba da ka jinglah jong ki ban pyndep ia kane ka training mynta kin sa lah ban ieng hala ki jong ki kjat, khlem da khmih lynti than ia ki kam sorkar namar ba ka long kaba eh haduh katta katta ban ioh ia ka kam sorkar ha kine ki sngi ba mynta.
Ha kane ka sngi u ma Brightstar ula plie ia ka Websiste jong ka MCSWA.
Kham hashwa jong ka jingialang la ioh ia ka jingpule Bible bad duwai da u Rev. D. Lyngdoh, ka jingkren pdiang na i Sunita Sunu, la ioh ruh ia ka jingrwai ia ka Theme Song jong ka MCSWA.
La ioh ruh ka jingkren na I Dr. Joanietta Shullai ba dei i Director & Founder MCSWA bad ia ka jingkren ai khublei la ai da A.J. Nongkynrih, Chief Functionery MCSWA.
La sam ruh ia ki Mementos sha ki dkhot ka seng bad kumjuh ia ki dkhot barim jong ka MCSWA. La sam ia ki certificate sha kito kiba la pyndep ia ka jingshah hikai ha ka Tailoring Course bad kumjuh ruh ki ba la pyndep ia ka piggery.
