U Lat ka Jylla u C.H Vijayashankar ula pynlong mynta ka sngi ia ka jingrakhe ia ka jingiohlaitluid (Independence Day 2025) ka ba 79 hapoh Raj Bhavan, Shillong ia kaba la tip kum ka “At Home” da kaba pylong ia ki prokram tynrai bad ki prokram ba pynpaw ia ka jingieit ri.
La wan ban iadon lang ruh da u Myntri Rangbah ka Jylla u Conrad K Sangma, ki MLA, ki heh sorkar, ki hep shipai bad ki nongshong shnong ba paw jong ka jylla.
Ia ki prokram bapher bapher la wan ban pynlong da ka tnat Arts & Culture ha ka jingiatreilang bad ka Indian Council for Cultural Relations (ICCR). La sdang ia ka prokram da ka jingiashim bynta lang ia ka jingrwai ri ‘Vande Mataram’ ba la lamkhmat da ka KHMIH Society bud sa ka jingpyni ia ka Meghalaya State Song ha ka Giant Screen da ka jingiaieng beit thik kum ka jingburom.
U Lat ula pyllait paidbah ruh ia ka kot kaba ai kyrteng “From Residency to Raj Bhavan”.
Ha kane ka prokram la ai burom ruh sha ki rang bad thei kiba la wanrah burom ia ka jylla bad ia ka ri kumjuh. Napdeng kine kynthup ia u Iarapborlang Chyne, Rifiness Warjri, Bhimavaa Doddabalappa Shille Kyathara, Dr. B. Manjamma Jogathi, u Steve Jyrwa bad i hep rit Baiahunlang Nongrum na ka SOS Children’s Village. Ka kala don ruh ka jingsam khusnam kaba la tip kum ka “Cyrstal Grace Nongkynrih Cash Awards” sha Dr. Mebanlamphang Lyngdoh, Ricky Paul Marwein, Rangkitbot C. Dohkrut, Ram Kynjin bad u Kyrmenlang Uriah.
