Ka ophis jong ka Bethany Society, Phramer ha kane ka 4 tarik kila rakhe kynmaw burom ïaka sngi kyrpang jong kiba duna dkhot met kaba la tip kum ka ‘International Day of Persons with Disabilities’, ïa kaba la pynlong ha Secondary School, Mukhap, West Jaiñtia Hills District halor ka phang “United in action to rescue and achieve the SDGs for, with and by persons with disabilities”
Ha kane ka sngi la wan ban ïashim bynta haduh 130 ngut haka jingdonlang u MLA ka thaiñ jong ka Mookaiaw Constituency ma Nujorki Sungoh, U Block Development Officer (BDO) jong ka Laskein C&RD Block u ma B. Niang, ki kynhun ka District Legal Service Authority, ki nonghikai, ki khynnah skul, kiba don jingduna ha ki dkhot, ki nongtrei ka Hans Foundation and Bethany Society, Phramer bad kiwei de.
La sdang ïa ka prokram da ki kyntien pdiang da u Womphermi Suchiang ha kaba la ïoh ka jingkren na u ma F. S Suiam uba la ai jingbatai hahor ka hok jong kiba don jingduna dkhot met katkum ka Act 2016. Ha ka juh ka por ki lah ban ïoh jingïarap da kaka kin mih shakhmat ban wad jingtip ba kham bniah na ka ophis Legal Aids.
Ka samla W. Tang na ka ophis Bethany Society, Phramer hapoh ka “project of Transforming of Mental Health for All” kala batai shaphang kane ka sngi ïa kaba la rakhe naduh ka snem 1992 haka 3rd December manla ka snem ba kum ki briew kiba don jingduna dkhot met ki don ruh ka hok ban im lang ha ka imlang ka sahlang nalor kiwei kiwei de.
Na ka liang u kongsan ma Nujorki Sungoh ha ka jingkren ula ai mynsiem kyrpang ïa kiba don jingduna haki dkhot met kiba la wan sha kane ka jingïalang ba kin long ki nuksa ïa kiwei ba kin lah ban ïeng hala ki jong ki kjat na ka bynta ban ïoh ïa ka thong jong ka jingjop ha ka jingim wat hapdeng ki jingeh ba kynduh.
La pynphuh shuh shuh ïa kane ka sngi da ki jingshad tynrai, ka jingdro dur bad ki jingïalehkai Sports, ha kane ka juh ka sngi la sam kumjuh ïa ki khusnam sha ki nongjop, katba ïa ki kyntien ai khublei la ïoh na Project Coordinator ka Hans Foundation ka samla W. Tang.
