Ka Dalmia Bharat Foundation ha ryngkat ka jingiatreilang bad ka Megha Ladies Club, DCBL Thangskai bad ka VO Wahiajer kila rakhe ia ka sngi kyrpang jong ki kynthei ne ka International Women’s Day mynta ka sngi (8/3/2025) ha shnong Wahiajer, East Jaintia Hills District.
Da kaba shim ia ka phang pdeng jong kane ka sngi “Accelerate Action,” la ioh ia ka jingkren na ki nongshahkhot sngewbha bad ki nongiashim bynta, kiba la ban jur halor ka jingpynkupbor ia ki kynthei. Ha kane ka sngi la pynlong ia ki jinglehkmen bapher bapher ba kynthup ia ka jingshad tynrai, ka jingpyniriam, ki jingialehkai sport ba kum ka football, ka jingiatan tyllai, ka jingiamareh byrni bad kiwei.
Ha kane ka sngi la iadonlang u Waheh Shnong jong ka shnong Wahiajer, ka Shweta Sarma kaba dei ka Secretary Megha Ladies Club, u ma Karlis Rymbai, IR Lead DCBL, u Jitumoni Kalita, CSR Lead DBF, u bah Khangbor Rymbai, Project Officer nalor kiwei de.
Kane ka jingrakhe ia ka sngi kyrpang jong ki kynthei ka pynpaw ia ka jingkut jingmut jong ka Dalmia Bharat Foundation ban pynkupbor ia ki kynthei jong ka thaiñ bad ka jingkyntiew ia ki ha ka imlang sahlang.
