Kum shibynta ban rakhe ia ka National Sports Day, ka ophis jong ka District Sports Officer, East Jaintia Hills District ha ryngkat ka jingiatreilang bad ka ophis jong u Deputy Commissioner, East Jaintia Hills District ha kane ka 29.08.2024, ki la pynlong ia ka Open Marathon na ka bynta ki nongshong shnong jong ka East Jaintia Hills District. Iaka jingmareh marathon kaba 8 KM la sdang naduh ka ophis barim u Deputy Commissioner shaduh Rymbai PHC bad wanphai biang sha ka ophis u Deputy Commissioner barim.
Ia ka lama la kaweh da u Deputy Superintendent of Police ka East Jaiñtia Hills District u bah S. Paslein ha ryngkat ka jingïadon lang ka District Sports Officer (DSO) ka East Jaiñtia Hills District ka kong S.M. Rapsang.
Ha ka jingmareh Marathon jong ki shynrang, u Knerlang Phawa u la ioh ban khur ia ka nam lahduh, u Rishan Meki Ryngkhlem u la wan ha ka kyrdan ba ar katba ia ka nam lai la ioh da u Sting Phawa.
Na ka liang ki khynthei pat, ka Phyrnai Kyndait ka la ioh ban khur ia ka khusnam kaba nyngkong katba ka Rosy Sana bad ka Lamsuk Phawa ki la ioh ia ka khusnam kaba ar bad kaba lai.
Ki nongjop ha ka First Prize ha kane ka Marathon ki la ioh ban ia ka khusnam da ka song pisa kaba 7000/- tyngka, ki nongjop ha ka second prize 5000/- tyngka katba ia ki nongjop Third Prize 3000/- tyngka.
Hadien kane la pynlong ruh ïa ka jingïakhun Exhibition Volleyball hapdeng ka East Jaiñtia Hills Team pyrshah ïa ka Deinchynrum Team ha madan ïalehkai Deinchynrum ha kaba ka Deinchynrum kala la long ka lahduh.
Ia ki khusnam sha ki nongjop ha ka Marathon bad ka Exhibition Volleyball Match la sam da ka Additional Deputy Commissioner EJHD, ka kong J.U. Kharpuri.
Lah ban kdew ba ka National Sports Day la ju rakhe man la u snem ha ka 29 tarik August ban kynmaw burom ia ka sngi kha jong u Major Dhyan Chand, u nongialehkai Hockey jong ka ri India uba la kha ha ka 29 tarik August 1905. La rakhe ruh ia ka National Sports Day ban sngewthuh shaphang ka jingdonkam jong ka jinglehkai sports bad ki jingmyntoi ha ka met ka phad jong ki briew bad ha kajuh ka por ban burom ia ki jingnoh synniang ha ka liang ka sports da ki riew ialehkai bapher bapher ba pawnam jong ka ri.
