Ka East Jaintia Mahila Congress Committee ha ka 26 tarik mynta u bnai ka la rakhe ia ka jingdap shisnem jong ka jingtreikam jong ka seng ha East Jaintia Hills District.
Ia ka tei ka lyngkhuh snem la pynlong ha ka ophis treikam jong ka I.N.C Rymbai Road Ladrymbai ha kaba u bah Reegeenal Shylla President ka East Jaintia Public Coal Association u la long u kongsan jong ka tei ka sngi kyrpang jong ka seng (E.M.C.C). La ia don lang ruh u symbud kongsan u bah Eris Rymbai, Vice President jong ka Khliehriat Block Congress Committee (k.b.c.c), u ma J. Dkhar President ka Ladrymbai Unit.
U kongsan ha ba ai jingkren u la ong “Ha ba nga sngap ia ka rumon trei kam jong ka Seng jong phi ka pynsngewthuh shaikdar ia nga ba ka jingthmu jong phi ka ba bha, phi don ia ka jingmut ka ban shakri ia ki paidbah khamtam ia ki kynthei ki ba shah ban beiñ bad kiba duk, ki ba mad ki jingeh, namar kata nga ai jingiaroh ia ka ne ka Seng jong phi ba nang iai kiew shaphrang, ka jingiatylli jong phi ka long ka bor. Sa shi sien nga kwah ban ong ko kynthei to long kum ka Phan Nonglait ka ba lah ban iada ia ka ri bad jait bynriew jong ngi, phi dei ki kynthei ki ba stad ki ba don ka bor ban ialeh pyrshah ia ki nongdie ri bad nongshun nga ai kit bok kit rwiang ia ka Seng jong phi ba kan nang imslem” Kiwei de kiba ai jingkren ki long i kong S. Sungoh, kong Gracebedel Rymbai iba dei i President jong ka Ladrymbai Mahila. Ia ka jingialang la pyniaid da ka kong Jhanika Siangshai President ka East Jaintia Mahila Congress Committee.