Ka Jylla Meghalaya mynta ka sngi ryngkat ka jingïasnohktilang bad ka pyrthei shityllup kala rakhe ïa ka sngi pyrshah dih bad khaïi drok kaba la tip kum ka ‘International Day against Drug Abuse and Illicit Trafficking’.
Ia kane ka prokram la rakhe ha U Soso Tham Auditorium, Shillong ha kaba u Deputy Chief Minister ka Jylla u bah Prestone Tynsong ula long u kongsan bad u Myntri ki kam Pohïing ka sorkar Jylla u ma Lahkmen Rymbui ula long u symbud kongsan.
Ia kane ka prokram la pynlong da ka Social Welfare Department ryngkat bad ka Meghalaya Police ryngkat ka jingiatreilang bad ki seng treimon sngewbha ka Foundations. Ka phang jong kane ka snem ka long ‘Drug Challenges in Health and Humanitarian Crises’
U bah Tynsong haba kren ha kane ka sngi ula ong ba ka jingkyrni ha ka jingdih drok ym tang ba ka ktah ia ka shimet jong u briew khamtam ki samla hynrei ka ktah ïa baroh ha ka imlang ka sahlang. U la pynpaw ka jingbynñiaw halor ka jingbun palat jong ki khun samla jong ka jylla kiba la ngop ha ka jingkyrni ïa u drok ha kine ki sngi. U khot u wer ïa ki kynhun bapher bapher ban wan shakhmat ban ïakhun ïa ka jingkhaïi beaiñ ïa u drok, khnang ba yn lah ban ïada ïa ki khun samla jong ka jylla.
Kiwei de kiba ai jingkren ha kane ka prokram ki kynthup ïa u ma Lahkmen Rymbui, u Myntri ki kam Pohïing ka sorkar jylla, i Chief Secretary kong Rebecca V Suchiang, IAS, u Director General of Police ka Meghalaya u Dr. L.R. Bishnoi, Dr. Pakha Tesia, MBBS, MD (Psychiatry) jong ka Mind and Wellness Clinic, u Bryan Wallang, Principal Kiddies Corner HSS, Shillong.
Ha kane ka sngi kala don ka jingïalehkai drama halor u drok da ka Kripa Foundation De-addiction Centre for Juneniles, Mawkasiang, ka jingphla na kiba sah ha KJPA New Hope De-addiction Centre for Males, Mawdiangdiang bad na ka Kripa Foundation De-addiction Centre for Juveniles, Mawkasiang. Ka don ruh ka jingrwai da u Neil Umwi bad Desmond Rimiki Sun na ka Meghalaya Police Cultural Troupes and Khaki Vibes.
U Sampath Kumar, Principal Secretary, Social Welfare Department ula ai ïa ka jingkrenpdiang bad ai jingkrensdang, katba u Pravin Bakshi, Commissioner & Secretary, Social Welfare Department u la ai ki kyntien ai khublei.
Ka la don ruh ka ruh ka jingpynkup burom ia ki Pulit da u kongsan.
