Mynta ka sngi 21 tarik u Kyllalyngkot 2025 ka sorkar jylla kala rakhe ïa ka jingïoh jylla ba 53 snem ne ka “Meghalaya Day”, ïa ka jingïalang la pynlong ha District Library Auditorium Mynthong Jowai.
Ha kane ka sngi la wan ban ïadonlang naduh u Myntri Rangbah ka jylla u Conrad k. Sangma, ki Symbud Myntri Rangbah u ma Sniawbhalang Dhar, u bah Prestone Tynsong, ka Dr. Mazel Ampareen Lyngdoh myntri ka IPR, u Sardor Mirayusupovich Rustambaev uba dei u Ambassador ka India Embassy jong ka Republic Uzbekistan, u bah D.P. Wahlang IAS Chief Secretary ka jylla, nalor ki ophisar sorkar bad ki paidbah kiba wan sakhi lang ïa kane ka Prokram.
Na ka liang jong u Conrad K. Sangma kum u kongsan haba ai jingkren ula pynpaw ka jingsngewkmen ba ka jylla kala lah ban ïaid lynti mynta la 53 tylli ki snem, da kaba pynsngew ruh ba ka jylla ka long kaba riew spah bha haka kam jngohkai pyrthei bad kane kan dang lah shuh shuh ban khring ïa ki nongwan shangkai pyrthei na kylleng ki jaka.
Da kaba ong ruh mynta ka jylla kala ïoh ïa ar tylli ki 5 Star Hotel bad shen kan sa ïoh sa 5 tylli ha kine ki snem ban wan. Ula pynpaw ruh lyngba ka jingkyntu jong u MP ka Rayja Sabha ha u ‘da kaba kren shai ïa ka ktien Pnar dei ban pynrung beit hapoh ka State Anthem, lada kumta un sa mih noh na ka seng NPP’.
Shuh shuh u Myntri Rangbah ula pynsngew ïa ki kam pynroi kiba la wanrah ha ka jylla da kaba pyntip mynta ka sngi la buh ïa u mawnongrim ban tei ïa ka Secretariat ba thymmai, ka jingpynheh ïa ka kad liengsuin ha Shillong (umroi) kaba lah ban hiar ki liengsuiñ ba heh kiba wan na kylleng ki jylla jong ka Ri.
Ha kane ka sngi u Myntri ula pyntip ïa ka Nursing College ha Jowai yn sdang ban tei noh ïa ka, khang ba kan long jingmyntoi ïa ka koit ka khiah jong ka jylla bad khamtam ïa ka thaiñ jong ka Ri-Lum Jaiñtia hi baroh kawei.
Ha kane ka sngi u Myntri Rangbah ula pyllait paidbah ruh ai ka jingrwai State Anthem kaba kynthup lang ïa ki lai tylli ki ktien Khasi, Jaiñtia bad Garo, la pynphuh shuh shuh ïa kane ka sngi da ki jingrwai bad ki jingshad thymrai. Kala don ruh ka jingsam khusnam sha ki nongtrei kam sorkar kiba la shakri hok ïaka kam.
Ïa ki kyntien pdiang sngewbah la ïoh na u bah B.S Sohliya Deputy Commissioner ka West Jaintia Hills District, katba ïa ki kyntien ai khublei la ïoh na u M.S Sangma MCS Director of Information & Public Relations.
