Ka Meghalaya Human Rights Commission (MHRC) mynta ka sngi kala rakhe ia ka jingdap 75 snem jong ka Universal Declaration of Human Right (UDHR) ba dei ka sngi rakhe jong ka International Human Right Day 2023 ha nongbah Shillong.
Ha kane ka sngi u Myntri Rangbah jong ka Jylla u Conrad K Sangma ula long u kongsan katba i Myntri ba dei pait ia ki kam aiñ i Dr. Ampareen Lyngdoh ila long i symbud kongsan.
U Myntri Rangbah haba ai jingkren ha kane ka jingialang ula pynpaw ia ka jingeh kiba ka Human Right ka hap ban mad, ha kaba ka shim ia ka kamram ban wanrah ia ka jingiaburom kylliang hapdeng ki jingiapher ha ka imlang ka sahlang. U khot ia ki nongthaw-aiñ bad ki nongiada ia ka hok bad u ai mynsiem ban kin pynthikna ba baroh ki nongshong shnong kin ioh ban im ka jingim ba mar iaryngkat bad kaba ia burom markylliang.
Ha kane ka sngi la iadonlang ruh u Chairperson jong ka MHRC u Justice T. Vaiphei, u dkhot ka MHRC u PJP. Hanaman, i kong B. Giri ba dei i Addl. Chief Secretary, Dr. Shakil P. Ahammed IAS, GOM bad Secretary MHRC bah F.M. Dopth IAS, u Director NEPA, IG Prisons, u DIG ki BSF, Vice Chancellor ka NLU, ki heh Pulit, ki dkhot na ka Civil Societies, ki samla pule Law bad kiwei de ki samla pule na ki college bad University bapher bapher.
Ha ka jingialang kaba ar la ioh ia ka jingkren lamkhmat da u Chairperson jong ka MHRC u Justice T. Vaiphei ula pynpaw ba ka long kaba donkam bha ban iada ia ka hok longbriew man briew ha baroh ki bynta jong ka imlang ka sahlang bad batai halor ka kamram jong ki nongtrei shakri paidbah ba kin ai ka jingiada ia ka hok ki nongshong shnong baroh.
La ioh ruh ia ka jingkren na u Dr. Arun Kumar Singh, Associated Professor Law Department bad u Amit Kumar, Advocate General High Court of Meghalaya.