Ka North Liberty Higher Secondary School, Mookyrdup Jowai mynta ka sngi kala sdang ban rakhe ïaka ‘Silver Jubilee’ ne ka jingdap 25 snem ka jingshakri haka liang ka jingnang jingstad, ha kane ka juh ka sngi la pynkup burom ruh ïa ki khynnah pule ka skul kiba la pass bha haka MBOSE mynta u snem 2025.
Ha kane ka sngi la wan ban donlang naduh u Symbud Myntri Rangbah ka sorkar jylla u ma Sniawbhalang Dhar kum u kongsan, u MLA ka Jowai ma Wailadmiki Shylla symbud kongsan, u Principal jong ka skul u ma Richard B. Uriah, ka kong A. P. Syiem kaba dei ruh ka Joint Director School Education & Literacy jong ka sorkar, ki kmie ki kpa jong ki khynnah skul bad ki nongshah khot sngewbha.
U Principal jong ka skul ula pynpaw ka jingsngewkmen kaba khraw eh namar ka skul mynta kala kynjoh sha u mawmer ba 25 snem, ula ai ka jingïaroh ïa u Symbud Myntri rangbah uba la kyrshan ïaka skul ha kiba bun ki liang bad haka juh ka por ula pdiang sngewbha ïa baroh kiba wan sha kane ka jingïalang.
Ula ong ïa kane ka skul la seng haka 1 tarik Lber jong ka snem 2000 bad ki don haduh 28 ngut ki khynnah skul haka Klas Nursary, K.G bad Klas-1. Hynrei kaba pynkmen ïa u kum u Principal ka long haduh mynta kila don 16 ngut ki khynnah jong ka skul kiba ïoh rung ïaka kyrdan Position (Top-List) jong ka Result MBOSE.
‘Ka skul kala wan bha shakhmat haka kam ïalehkai Sports bad kala jop shibun ki jingïakhun naduh ka Athletic, ka Phutbol nalor kiwei de’, Ula ong kine baroh dei lyngba ka jingïalam bastad jong u Blei Trai kynrad uba najrong.
U kongsan ma Sniawbhalang Dhar haba ai jingkren ula ai ka jingïaroh ïa ki nongpynïaid jong ka skul khamtam eh ïa u Principal u ma Richard B. Uriah ula la trei shitom kumno ban ïalam ïa ka skul katkum ka jingïaid jong ka por. Haka juh ka por u pynpaw ka jingsngewkmen ban don kum kine ki skul napoh ka Ri-Lum Jaiñtia kiba la paw bha shakhmat haka liang ka pule ka puthi.
Da kaba u kyntu ïa ki kmie ki kpa ba kim dei ban pynleit jingmut tang ban ïoh phah skul ïa ki khun shabar na ka District namar hapoh ka District ruh ka jinghikai ka long ka juh hi kumba long sha kiwei de ki jaka.
Ula kyntu ïa ki khynnah skul ba kin long kiba trei shitom ha ka pule puthi, khnang ban suk ka lawei jong ki, u kitbok ïa ki khynnah skul ba kin poi sha ka thong ka jingjop ban long kita ki riew proh jabieñ kiba bat ïa ki kyrdan ba halor bad ban long ruh ki nongïalam kiba ïohi jngai ban wanrah burom ïa ka ïing ka sem, ka District bad ïa ka jylla hi baroh kawei.
Shuh shuh ula pyntip na ka liang ka sorkar ruh kala pynkreh ban plie noh ïa ka MPSC Center hapoh ka sor Jowai, khnang ban suk ki paidbah ka Ri-Lum Jaiñtia.
