Ka ophis treikam ka Nehru Yuva Kendra Sangathan, Jowai ryngkat ka jingiatrei lang ka tnad treikam jong ka Ministry of Road Transport and Highway (MorRTH) ka sorkar India ka la pynlong ia ka jingrakhe ia ka “National Road Safety Awareness Campaign” kaba la sdang naduh ka 17 tarik mynta u bnai bad yn pynkut noh ha ka 23 tarik u kyllalyngkot 2025.
Kumba shu pynkynmaw ka jingjia accident hapoh ka ri bad ka jylla jong ngi ki jia ha man la ka por shibun ki mynsiem briew kiba la duh noh ia la ka jong ka jingim na ki jingjia accident.
Dei namar kane ka daw la shim ia kane sienjam kum ka wei ki jingeh kaba ki briew ki mat ha man ki por hapoh ka imlang sahlang. Ia kane ka Campaign la pynlong ha kylleng ki jaka ha sor Jowai, ha iew bad ha ki jaka skul ki jaka sumar da kaba sam ia ki pamphlet ryngkat ka jingpynsngewthuh paitbah ia ki lad jingiada.
La pynsngewthuh ruh ia ki kyndon aiñ kiba ia dei bad ki nong ñiah kali kaba kynthup ia baroh ki nongñiah kali ban lait naka jingjia accident kumjuh ruh ban lait na ka jingpynshitom bad ka jingpynsaja jong ka aiñ.
Ha kane ka programme la lam khmat da i Damanbha Pale i ba dei peit ia ka tnat trei kam ka Jowai Traffic Police, la ia shimbynta lang ruh da ki khynnah samla na kylleng ki shnong kiba don hapoh ka District.
