Ki bor peit bor pynïaid ka R.C. Eve School Mihmyntdu kawei na ki Shlem ai jinghikai ïa ki khynnah ba wan na ki longiïng longsem ba ban ka jingduk mynta ka 14 tarik Naiwieng ha ka thong ban pynkmen pynka-it ïa ki khynnah ka la rakhe ïa ka lyngkhuh snem sngikha u Pandit Jawaharlal Nehru ba la tip kum ka Children Day.
Ha ka jingïalang jong kane ka sngi lawan ban sakhilang da u P. Joshi, Representative Max Cement Nongsning, East Jaiñtia Hills ryngkat ka jingïadonlang u E. Pale, ka Sister Pushpita bad ki nonghikai, la ïoh ruh ka jingkren maitphang halor kane ka sngi na ka kong Tina Lakiang, Secretary SMC R.C. Eve School Mihmyntdu.
U P. Joshi haba kren ula ai mynsiem ïa ki khynnah ba kim dei ban duh jingkyrmen ha ka jingim wat la ban ka jingduh jingkyrduh bad hap ban trei shitom namar ka jingim briew ka dei ka jingïaleh wat la don ha kano kano ka bynta.
Na ka liang u P. Joshi kum shibynta ban pynkmen ïa ki khynnah skul ka R.C. Eve School Mihmyntdu ha kum kane ka sngi ula ai sngewbha ruh ïa ki da ki jingbam bad ruh ula kular ba katba lah la ibor un synñiang ruh da kiwei ki jingïarap sha kine ki khynnah ha ki por ki ban sa wan.
Shuh shuh ha kane ka sngi la pynbyrngia ruh ïa ki khynnah da ki jingshad, jingrwai na ki nonghikai bad ki ïakop lehkai bapher kum ka Baloon race, Marble Race, Tug of war bad kiwei.
