Kum shibynta na ka jingrakhe ia ka World Suicide Prevention Day, ka SAN-KER, Shillong hynnin ka sngi ka la pynlong ia ka jingiatai bniah halor ka phang kaba ia dei bad ki lad ban iada na ka “Jingdkhat jubor ia la ka jong ka jingim” ha ka jingialang kaba la long ha Auditorium ka Don Bosco College, Byndihati ha kaba la iadon lang i Dr. S. Syiem, Director, SAN-KER, Shillong ha ka jingiadon lang ryngkat u Fr. George S. Lyngkhoi, Principal ka Don Bosco College, Byndihati, i Dr. D. Shylla, District Medical and Health Officer, Rev. E.S. Sapuh, Director, Ephphatha Society, ki nonghikai, ki khynnah skul bad kiwei kiwei de.
Ha ka jingkren jong i ha kane ka programme, i Dr. S. Syiem, Director, SAN-KER i la iathuh ba ki briew kiba pyrshang ban pyniap ia lade ki donkam ia ka jingiarap bad dei ban don ka jingshlur ban leit kynduh ia kum kita ki briew khnang ban ai mynsiem ia ki ban ialeh pyrshah ia ka thma mynsiem kaba don ha ka jingim jong ki. I la kren ruh halor ka jingshah lehbeiñ ki khynnah bad iathuh ruh ba ki khynnah kiba la mad ia kane ka jingshah lehbeiñ ka lah ban ialam ia ki sha ka jingdkhat jubor ia la ka jong ka jingim ynda ki la kham heh kham san.
Ha kane ka jingialang, i Dr. Syiem i la kren ruh shaphang ki jingjia kiba sngewsih ha ka pyrthei ha kaba ki briew kiba la tymmen ki dkhat jubor noh ia la ka jong ka jingim lehse, namar ba ki khun ki kti ki kim suidñiew shuh ia ki ne na ka daw ba kim lah shuh ban trei ban ktah namar ka noh tymmen jong ki.
U Fr. George S. Lyngkhoi, Principal ka Don Bosco College, Byndihati ha ka jngai jingkren u la ong ba ki briew kiba thmu bad pyrshang ban pyniap noh ia lade ki dei kito kiba don ka jingshitom ha ka med ka phad, ne kiba shah ktah ha ka jingmut jingpyrkhat na kino kino ki daw, bad dei ban sngewthuh ba kum kine ki briew ki donkam ia ka jingkitkhia bad jingiasyllok, da kaba ai jingiaroh ia ka SAN-KER na ka bynta ban pynlong ia kane ka programme kaba long ka rynsan ban pynsaphriang kylleng ia ka khubor ba ka long kaba lah ban iada na ka jingdkhat jubor ia la ka jong ka jingim(suicide).
Ha ka juh ka por, i Dr. D. Shylla, District Medical and Health Officer, East Jaintia Hills District, i la kren shaphang ka jingshitom kaba ktah ia ka bor pyrkhat bad i la ai jinghikai ha kane ka jingialang ba ka long kaba lah ban iada na kane ka jingshitom lyngba ka jingkyrshan lang jong ka shnong ka thaw bad khamtam eh da ki bahaiing hasem jong u briew uba don ia kane ka jingshitom.
La sdang ia ka programme da ka jingiatai bniah ba la pyniaid da i Dr. D. Shylla, District Medical and Health Officer, East Jaintia Hills District, katba i kong Isabella Shadap, Clinical Psychologist, i la lum lang ia ka jingmih na kane ka jingiatai bniah halor ka jingiada na ka jingdkhat jubor ia la ka jingim.
Kham ha shuwa kane ka programme, khnang ban wanrah ia ka jingpynsngewthuh halor kane ka phang, la pynlong ia ka Cycle Rally ha kaba la shim bynta shitrhem da ki nongshong shnong ka district kynthuh lang ki khynnah, kaba sdang na Don Bosco College, Byndihati ter ter shaduh Good Shepherd Secondary, Ladrymbai, bad phai biang sha Don Bosco College.
La ban iathuh lyngkot ba la ju rakhe manla u snem ia ka 10 tarik u bnai Nailur kum ka Suicide Prevention Day kylleng ka pyrthei da ka jingthmu ban pynduna ia ki jingjia kiba sngewsih kum ka jingbthat jubor ia ka jingim(suicide) bad ban pynsngewthuh ia ki shnong ki thaw shaphang ka bor kumno ban iada na kane.
La pynlong noh ia kane ka jingkhmih thuh halor kane ka phang mynta ka sngi ha Khliehriat na ka daw ka jinghap ka 10 tarik u Nailur ha ka sngi u Trai (Sunday).
