Ka State BJP jong ka Jylla Meghalaya mynta ka sngi kala rakhe ia ka lyngkhu sngi kha ba 73 snem jong u Prime Minister Narendra Modi. Ia ka prokram la sdang da ka jingiaot Cake da y National Vice President u Chuba Aoo.
Ha kane ka sngi la wan ban iashim bynta lang da ki nongkitkam jong ka Party naduh kiba na ka State haduh kiba na ki District bapher baphaer, ki dkhot jong ka Mahila Morcha bad ki Yuva Morcha ha ka jingialang kaba la pynlong ha ophis treikam ka seng ha nongbah Shillong. La wan ruh ban pynshit ia ka prokram da u Myntri ka sorkar Pdeng u Prallad Johshi.
Ha kane ka sngi ka BJP kala pynbna ba naduh ka 17 tarik mynta u bnai haduh ka 2 tarik u October kan pynlong ia ka prokram ba ar-taiew shisien na ka bynta ban pynpoi ia ka thong jingshakri sha ki nongshong shong ka ri kiba dang don hapdeng ka jingduk ba kin ioh ia ki skhim sorkar bapher bapher. La pynkynmaw ruh ba u Prime Minister ula dep ban pyllait paidbah ia kawei ka skhim na ka bynta ki nongtrei jingtrei da ki kti lajong bad ki nongsaindur ia kaba la tip kum ka PM Vishwakarma Scheme ha ka sngi ba rakhe ia ka Vishwakarma Jayanti. Kane ka skhim kam dei tang ba kan iarap pynioh pisa lyngba ki jingairam ha ka sut kaba jem eh, hynrei kan iarap ruh ban pynim biang ia riti ka dustur kaba la ai pateng la pateng ha ki nongshong shnong.
Ia kane ka skhim la pynioh jingiarap da ka sorkar pdeng kaba la kot haduh Rs.13,000/- klur tyngka. U Chuba ula pynpaw ba kumno u Modi ula pynlut ia ka jingim jong u na ka bynta ka jingbha jong ki nongshong shnong jong ka ri India. Ula ong ruh ba u Prime Minister u don ka thong ban pynlong ia ka ri Inida kum ka ri ba ba wan nyngkong duh, ha kaba ki nongialam jong ka pyrthei kila don ka jingshaniah ha u Modi.
Ia kane ka sngi kha jong u Modi la rakhe ha ki District bapher bapher bad kumjuh ha ka Regional Ophis kaba don ha nongbah Tura.
